સુરત ઇન્ટરનેશનલ એરપોર્ટ પર ફ્લાઇટના લેન્ડિંગ સમયે એક અત્યંત ગંભીર અને ચોંકાવનારી સુરક્ષા ચૂક સામે આવી છે. દિલ્હીથી સુરત આવી રહેલી ઇન્ડિગોની ફ્લાઇટ પર અજાણ્યા શખ્સો દ્વારા ગ્રીન લેઝર લાઇટ ફેંકવામાં આવતા એરપોર્ટ પ્રશાસનમાં દોડધામ મચી ગઈ છે. રનવે પર લેન્ડિંગની અંતિમ અને નાજુક ક્ષણોમાં જ પાયલટની આંખો સામે આ તેજસ્વી લેઝર લાઇટ આવી જતાં વિમાનની સુરક્ષા સામે મોટો ખતરો ઊભો થયો હતો, જો કે પાયલટની સતર્કતાના કારણે મોટી વિમાન દુર્ઘટના ટળી ગઈ છે.
પાયલટે ATCને કરી તાકીદની જાણ
મળતી માહિતી મુજબ, દિલ્હી-સુરત ઇન્ડિગો ફ્લાઇટ નંબર 6E-6511 જ્યારે સુરત એરપોર્ટ પર લેન્ડ કરી રહી હતી, ત્યારે અચાનક બહારથી પ્લેન પર ગ્રીન લેઝર લાઇટ ફ્લેશ થઈ હતી. આ ઘટનાથી પાયલટની આંખો અંજાઈ ગઈ હતી. પાયલટે સ્થિતિની ગંભીરતા સમજીને સહેજ પણ સમય બગાડ્યા વિના એર ટ્રાફિક કંટ્રોલને તાકીદે આ ઘટના અંગે રેડિયો પર જાણ કરી હતી.
