Surat News: ઇન્ટરનેશનલ એરપોર્ટના વાહન પાર્કિંગ એરિયામાં ફરી ડુક્કર દેખાયા, તંત્રની ગંભીર બેદરકારી

સુરતનું એરપોર્ટ ફરી વાર ચર્ચામાં આવ્યું છે. એરપોર્ટના વાહન પાર્કિંગ એરિયા પાસે પશુઓ ફરતા હોવાનો બનાવ સામે આવ્યો છે. વરસાદની સિઝનમાં પાર્કિંગ એરિયામાં ડુક્કર દેખાયા હોવાનું જાણવા મળ્યું છે. અગાઉ જુલાઈ મહિનામાં પણ ડુક્કર દેખાયા હતાં. આમ એરપોર્ટ પર સુરક્ષાનો અભાવ જોવા મળી રહ્યો છે. યાત્રીઓની સુરક્ષા વ્યવસ્થાને લઈને નારાજગી જોવા મળી છે.

અગાઉ 16 જુલાઈના રોજ ડુક્કર દેખાયા હતા

સુરત એરપોર્ટ પર અવારનવાર પશુઓ જોવા મળતા હોય છે. આ વખતે એરપોર્ટના પાર્કિંગમાં ડુક્કર ફરતા હોવાની જાણકારી મળી હતી. એરપોર્ટ પર યાત્રીકોની સુરક્ષા મામલે ગંભીર બેદરકારી સામે આવી છે. એરપોર્ટના પાર્કિંગમાં ડુક્કરો ફરતા હોવાથી લોકોમાં અનેક પ્રકારની ચર્ચાઓ શરૂ થઈ છે. અગાઉ 16 જુલાઈના રોજ પણ ડુક્કર ફરતા દેખાયા હતાં. એરપોર્ટ પર સલામતિના ધોરણો ને લઈને સવાલો ઉભા થયાં છે.

ઘણી વખત ભૂંડ પણ જોવા મળ્યા

સુરત એરપોર્ટ પર ઘણી વખત ભૂંડ પણ જોવા મળ્યા છે. તાજેતરમાં એરપોર્ટ પરથી શિયાળ અને બિલાડી પકડાયા હતાં. એરપોર્ટ પર ફરતા પશુઓને પકડવા માટે વન વિભાગ દ્વારા પાંજરા મુકવામાં આવ્યા હતાં. એરપોર્ટ ઓથોરિટીએ ગંભીરતાથી લઈ ત્યાં ઉગી નીકળેલા ઘાસ કાપવા સૂચના આપી હતી. આ ઉપરાંત એક વિમાન પર મધમાંખીઓનું ઝૂંડ પણ ચોંટ્યું હોવાની ઘટના સામે આવી હતી. આ પ્રકારની ઘટનાઓથી પ્રવાસીઓની સલામતિ અને સુરક્ષા અંગે અનેક સવાલો ઉભા થયાં છે.