Suratની વરાછા પોલીસે ગુમ થયેલી 8 વર્ષની બાળકીને ગણતરીના કલાકોમાં શોધી અને પરિવારને સોંપી

સુરત શહેરમાં આજે પોલીસની સરાહનીય કામગીરીનો એક ઉદાહરણરૂપ કિસ્સો સામે આવ્યો છે. વરાછા વિસ્તારમાંથી ગુમ થયેલી 8 વર્ષની એક બાળકીને પોલીસે માત્ર 4 કલાકની અંદર શોધી કાઢી અને તેના પરિવારને સુરક્ષિત રીતે પરત સોંપી હતી. પોલીસની આ સતર્કતા અને ઝડપી કાર્યવાહીથી પરિવારજનોની આંખોમાં ખુશીના આંસુ આવી ગયા હતા. વરાછા વિસ્તારમાં ભારે ટ્રાફિક હોવાના કારણે આ 8 વર્ષની એક બાળકી પોતાના પરિવારથી વિખૂટી પડી ગઈ હતી.

વરાછા વિસ્તારમાંથી 8 વર્ષની બાળકી થઇ હતી ગુમ

પરિવારજનોએ બાળકીને આસપાસના વિસ્તારમાં ઘણી શોધખોળ કરી હતી. પરંતુ બાળકી ન મળતા તેમણે તાત્કાલિક વરાછા પોલીસ સ્ટેશનમાં જાણ કરી હતી. બાળકી ગુમ થયાની જાણ થતાં જ પોલીસની ટીમ તાત્કાલિક સક્રિય થઈ ગઈ હતી. ત્યાર બાદ પોલીસે બાળકીને શોધવા માટે યુદ્ધના ધોરણે કામગીરી શરૂ કરી દીધી હતી. પોલીસે આસપાસના વિસ્તારમાં લાગેલા 77થી વધુ સીસીટીવી કેમેરાના ફૂટેજ તપાસ્યા હતા અને બાળકીની હલનચલન પર નજર રાખી હતી.

બાળકી વરાછાથી 4.5 કિમી દૂર ભાતવાડીમાંથી મળી આવી

પોલીસની સતત મહેનત અને ટેકનિકલ સર્વેલન્સને કારણે બાળકી 4.5 કિલોમીટર દૂર આવેલા ભાતવાડી વિસ્તારમાંથી મળી આવી હતી. પોલીસ બાળકીને સુરક્ષિત રીતે પોલીસ સ્ટેશન લઈ આવી હતી અને બાદમાં તેના પરિવારને સોંપી દીધી હતી. બાળકી સુરક્ષિત મળી આવતા પરિવારજનોએ પોલીસનો હૃદયપૂર્વક આભાર વ્યક્ત કર્યો હતો. આ ઘટનાએ ફરી એકવાર સાબિત કર્યું છે કે પોલીસ માત્ર ગુનાખોરી અટકાવવા માટે જ નહીં પરંતુ આવા સંવેદનશીલ કિસ્સાઓમાં પણ લોકોની મદદ કરવા માટે હંમેશા તત્પર હોય છે.