હીરાનગરી સુરતના કાપોદ્રા વિસ્તારમાંથી રત્નકલાકાર ભાઈઓની દાદાગીરીનો એક ચોંકાવનારો કિસ્સો સામે આવ્યો છે. એક હીરાના કારખાનામાં શિસ્ત અને નિયમોનું પાલન કરવાનું કહેવા જેવી સામાન્ય બાબતે રત્નકલાકારો ઉશ્કેરાઈ ગયા હતા અને મેનેજર પર જીવલેણ હુમલો કરી દીધો હતો. આ ચકચારી ઘટનાના લાઈવ દ્રશ્યો સીસીટીવી (CCTV) કેમેરામાં કેદ થઈ જતાં સમગ્ર ડાયમંડ એસોસિએશન અને શ્રમિકોમાં ભારે ચર્ચા જાગી છે.
પૂર્વ આયોજિત કાવતરું અને બાથરૂમમાં ઢોર માર
આ હિંસક ઘટના કાપોદ્રા વિસ્તારમાં આવેલા 'પંકજ ડાયમંડ' નામના હીરાના કારખાનામાં બની હતી. કારખાનાના પાટીદાર મેનેજર ગૌતમ ઇટાલીયાએ કર્મચારીઓને શિસ્ત જાળવવા અને પંચિંગના નિયમનું પાલન કરવાનું કહ્યું હતું. આ બાબત એક રત્નકલાકારને નાગવાર ગુજરી હતી. તેણે પૂર્વ આયોજિત કાવતરાના ભાગરૂપે પોતાના ભાઈને પણ કારખાનામાં બોલાવી લીધો હતો અને મેનેજરને બાથરૂમ નજીક એકલા ઘેરી લીધા હતા. બંને ભાઈઓએ અંદાજે દોઢ મિનિટ સુધી બેફામ ગાળો આપીને મેનેજરને આડેધડ ઢોર માર માર્યો હતો.
