તાપીના વ્યારામાં આવેલી આદિત્ય એલ્યુમિનિયમ નામની કંપનીમાં એક ભયાનક બ્લાસ્ટ થયો છે. આ ઘટનામાં પાંચ વ્યક્તિઓને ઈજા પહોંચી છે અને તેમને સારવાર માટે હોસ્પિટલમાં ખસેડવામાં આવ્યા છે. આ બ્લાસ્ટ એટલો જોરદાર હતો કે તેના અવાજથી આસપાસના વિસ્તારોમાં ભયનો માહોલ ફેલાઈ ગયો હતો. આ ઘટના ત્યારે બની હતી જ્યારે કંપનીમાં ફર્નેશ ઓઇલ ખાલી કરવા માટે એક ટેન્કર આવ્યું હતું.
ફર્નેશ ઓઇલ ખાલી કરવા આવેલા ટેન્કરમાં આગ
આ ટેન્કરમાં અચાનક આગ લાગી હતી અને થોડી જ ક્ષણોમાં તે ધડાકાભેર ફાટ્યું હતું. બ્લાસ્ટની તીવ્રતા એટલી વધારે હતી કે કંપનીના શેડના પતરા પણ હવામાં ઉછળીને દૂર જઈ પડ્યા હતા. બ્લાસ્ટના કારણે કંપનીમાં કામ કરતા કર્મચારીઓમાં નાસભાગ મચી ગઈ હતી. તેમજ આ ઘટનામાં એક વ્યક્તિને ગંભીર ઈજાઓ પહોંચી હતી. જેને તાત્કાલિક સારવાર માટે નજીકની હોસ્પિટલમાં ખસેડવામાં આવ્યો છે. હાલ તેની હાલત સ્થિર હોવાનું જાણવા મળ્યું છે.
