Mehsanaના ઊંઝામાં વરસ્યો ધોધમાર વરસાદ, મેઈન અંડરપાસમાં પાણી ભરાતા વાહનવ્યવહાર ખોરવાયો

મહેસાણા જિલ્લાના ઊંઝામાં આજે લાંબા સમયના વિરામ બાદ મેઘરાજાએ ધમાકેદાર એન્ટ્રી મારી હતી. ધોધમાર વરસાદના કારણે શહેરના અનેક વિસ્તારોમાં પાણી ભરાયા હતા. જેનાથી જનજીવન પ્રભાવિત થયું હતું. મુશળધાર વરસાદને કારણે ઊંઝાનો મુખ્ય અંડરપાસ સંપૂર્ણપણે પાણીમાં ગરકાવ થઈ ગયો હતો.

પાણી ભરાતાં વાહન વ્યવહાર બંધ કરાયો

જેના કારણે વાહનવ્યવહાર ખોરવાયો હતો. અંડરપાસમાં પાણી ભરાઈ જવાથી વાહનોની લાંબી કતારો લાગી હતી અને વાહનચાલકોને ભારે હાલાકીનો સામનો કરવો પડ્યો હતો. સુરક્ષાના કારણોસર અંડરપાસ બંધ કરી દેવામાં આવ્યો હતો. શહેરના નીચાણવાળા વિસ્તારો જેવા કે વાડીપરા ચોક, સ્ટેશન રોડ, ગાંધીચોક અને બાળોજ માતા મંદિર રોડ પર પણ વરસાદી પાણી ભરાઈ ગયા હતા.

સ્થાનિક લોકોને ગરમીમાંથી મળી રાહત

આને કારણે દુકાનદારો અને સ્થાનિક લોકોને મુશ્કેલીઓ પડી હતી. જોકે એક તરફ વરસાદથી મુશ્કેલીઓ સર્જાઈ હતી તો બીજી તરફ અસહ્ય ગરમી અને બફારાથી કંટાળેલા લોકોને મોટી રાહત મળી હતી. લાંબા સમયથી વરસાદની રાહ જોઈ રહેલા ખેડૂતો અને સ્થાનિક લોકોમાં વરસાદના આગમનથી ખુશીની લાગણી જોવા મળી હતી. આશા છે કે આ વરસાદ ખેતી માટે પણ ફાયદાકારક સાબિત થાય.