Vadodara: પાદરાના સોખડાખુર્દ ગામમાંથી મગરના 16 બચ્ચાંનું રેસ્ક્યૂ કરાયું

વડોદરામાં ચોમાસાની સિઝનમાં વિશ્વામિત્રી નદીમાં પાણીની આવક થતાં જ મગર શહેરમાં ઘૂસી જતાં હોય છે. વરસાદની સિઝનમાં શહેરમાં રહેણાંક વિસ્તારોમાં મગર ઘૂસી જતાં હોવાની અનેક ઘટનાઓ સામે આવી છે. ત્યારે વડોદરાના પાદરામાંથી મગરના બચ્ચાં મળતાં તેમને પકડીને સલામત સ્થળે ખસેડી દેવાયા હતાં. મગરના બચ્ચાંનુ સુરક્ષિત રીતે રેસ્ક્યૂ કરી તેમને સલામત સ્થળે ખસેડવામાં આવ્યા હતાં.

16 બચ્ચાને સુરક્ષિત સ્થળે છોડી દેવાયા

પ્રાપ્ત વિગતો પ્રમાણે વડોદરાના પાદરામાં સોખડાખુર્દ ગામેથી મગરના 16 બચ્ચાં મળી આવ્યા હતાં. આ તમામ બચ્ચાઓને રેસ્ક્યૂ કરવા માટે એક જાગૃત નાગરિકે પ્રાણી જીવ સંરક્ષક સંસ્થા અને ફોરેસ્ટ વિભાગનો સંપર્ક કર્યો હતો. જેથી સંસ્થા અને ફોરેસ્ટ વિભાગ દ્વારા મગરના બચ્ચાને માછલીની જાળમાં પકડીને રેસ્ક્યૂ કરવામાં આવ્યા હતાં. ત્યારબાદ આ 16 બચ્ચાને સુરક્ષિત સ્થળે છોડી દેવાયા હતાં.

CPP કંપનીમાં એક 3 ફૂટ મગર દેખાયો

વડોદરામાં ગ્રામ્ય વિસ્તારમાં આવેલ પોર નજીક વડસાલા ગામ પાસે CPP કંપનીમાં એક 3 ફૂટ મગર દેખાયો હતો. મગર દેખાતા કંપનીમા કર્મચારોમાં ભય ફેલાયો હતો. ત્યારબાદ વાઈલ્ડ લાઈફ ટીમને જાણ કરવામા આવી હતી. ટીમ દ્વારા ખાડામાંથી મગરનું ભારે જહેમત બાદ રેસ્ક્યૂ કરાયું હતું. ત્યાર બાદ તેને સલામત સ્થળે છોડી દેવાયો હતો.