હાલોલથી વડોદરા તરફ જતા માર્ગ પર આવેલા વાઘોડિયાના પાંચ દેવલા ગામ નજીક એક ગમખ્વાર માર્ગ અકસ્માત સર્જાયો છે. આ દુર્ઘટનામાં એક વ્યક્તિનું કરુણ મોત નિપજ્યું છે, જ્યારે અન્ય એક વ્યક્તિ ઇજાગ્રસ્ત થયો છે. પ્રાથમિક માહિતી મુજબ, કારચાલકે કોઈ અકળ કારણોસર સ્ટિયરિંગ પરનો કાબૂ ગુમાવ્યો હતો. કાબૂ ગુમાવ્યા બાદ કાર રોડ પરથી નીચે ઊતરીને બાજુમાં આવેલા એક ઝાડ સાથે ભયંકર રીતે ટકરાઈ હતી. ટક્કર એટલી જોરદાર હતી કે કારનો આગળનો ભાગ સંપૂર્ણપણે ભાંગી ગયો હતો.
કારમાં સવાર પાંચ વ્યક્તિઓમાંથી એકનું મોત, એકને ગંભીર ઈજા
અકસ્માત સર્જાયો ત્યારે કારમાં કુલ પાંચ જેટલા લોકો સવાર હતા. આ ભયંકર અકસ્માતને કારણે પાંચ પૈકી એક વ્યક્તિનું ઘટનાસ્થળે જ મોત નિપજ્યું હતું. જ્યારે અન્ય એક વ્યક્તિને ગંભીર ઇજાઓ થતાં તેને તાત્કાલિક સારવાર માટે નજીકની હોસ્પિટલમાં ખસેડવામાં આવ્યો હતો. સદભાગ્યે, બાકીના ત્રણ વ્યક્તિઓનો આબાદ બચાવ થયો છે. કારચાલકે સ્ટિયરિંગ પરનો કાબૂ શા માટે ગુમાવ્યો, તે જાણવા માટે પોલીસે વધુ તપાસ હાથ ધરી છે. રોડની બાજુમાં ઝાડ સાથે અથડાવવાના કારણે કારમાં સવાર મુસાફરોને ગંભીર નુકસાન થયું હતું.
