ગુજરાતમાં સરકાર સામે ફરીવાર આંદોલનનું શસ્ત્ર ઉગામવામાં આવ્યું છે. ખેડૂતો ખાનગી કંપનીના વીજપોલ અને જમીન સંપાદનના વળતર મુદ્દે સરકાર સામે આંદોલન કરી રહ્યાં છે. તો બીજી બાજુ શિક્ષકો પણ ટેટ પરીક્ષાના મુદ્દે સરકાર સામે બાંયો ચઢાવી રહ્યાં છે. શિક્ષકોની માગ છે કે, TAT ફરજિયાત રદ કરો. આ આંદોલનમાં હવે શૈક્ષિક સંઘની પણ એન્ટ્રી થતાં મામલો વધુ ઉગ્ર બને તેવી શક્યતાઓ છે.
બેનરો અને સુત્રોચ્ચાર સાથે આક્રોશ ઠાલવ્યો
વડોદરા શૈક્ષિક સંઘ દ્વારા ટેટ પરીક્ષાના મુદ્દે આંદોલનનો માર્ગ અપનાવવામાં આવ્યો છે. જેમાં વર્ષ 2010 પહેલાં નિમણૂક પામેલા શિક્ષકો માટે ટેટ પરીક્ષા ફરજિયાત કરવાના નિર્ણય સામે ઉગ્ર વિરોધ નોંધાવાયો છે. આ કાયદાના વિરોધમાં રાજ્યના 22 જિલ્લાઓમાં શિક્ષકો દ્વારા વિશાળ ધરણા પ્રદર્શનો યોજવામાં આવ્યા હતા. જેમાં વડોદરા સહિત વિવિધ જિલ્લા પંચાયત કચેરીઓ ખાતે શિક્ષકોએ બેનરો અને સુત્રોચ્ચાર સાથે આક્રોશ ઠાલવ્યો હતો.
