ગુજરાતમાં સ્થાનિક સ્વરાજ્યની સંસ્થાઓમાં મહિલાઓને સત્તા સોંપવા માટે અનામત પ્રથા લાગુ કરવામાં આવી છે, પરંતુ વાસ્તવિકતા કંઈક જુદી જ હોવાના કિસ્સા અવારનવાર સામે આવતા રહે છે. વડોદરા જિલ્લાના કરજણ તાલુકાના હાંડોદ ગામેથી આવો જ એક ચોંકાવનારો કિસ્સો પ્રકાશમાં આવ્યો છે, જ્યાં મહિલા સરપંચના પતિદેવ સરકારી નિયમોને નેવે મૂકીને આખા ગામ પર પોતાનો રોફ જમાવી રહ્યા છે. હાંડોદ ગામના મહિલા સરપંચ શીતલબેન ગોસ્વામીના પતિ અમિત ગોસ્વામીની દાદાગીરી અને તોછડાઈભર્યા વર્તનનો એક લાઈવ વીડિયો સોશિયલ મીડિયા પર વાયરલ થતાં સમગ્ર પંથકના રાજકારણમાં ગરમાવો આવી ગયો છે.
પાણીની સમસ્યાની રજૂઆત કરવા ગયેલા ગ્રામજનોને ધમકાવ્યા
મળતી માહિતી મુજબ, હાંડોદ ગામમાં છેલ્લા કેટલાય સમયથી પીવાના પાણીની ગંભીર સમસ્યા સર્જાઈ છે. આ મામલે ગામના ત્રસ્ત સ્થાનિક રહીશો જ્યારે સરપંચને રજૂઆત કરવા માટે ગયા હતા, ત્યારે ત્યાં હાજર મહિલા સરપંચના પતિ અમિત ગોસ્વામી ગ્રામજનો પર ભડક્યા હતા. તેમણે કાયદાનું ભાન ભૂલીને ગ્રામજનો સામે ખુલ્લેઆમ દાદાગીરી કરતા કહ્યું હતું કે, "ગામનો વહીવટ તો હું જ કરીશ!"
