Vadodara : ભુવાથી જ નવા વર્ષનું સ્વાગત, કોર્પોરેશના પ્રતાપે મસમોટો ભુવો શહેરીજનોને ભેંટમાં મળ્યો

વડોદરા શહેરમાં વધુ એક ભુવો પડ્યો છે અને ભુવાથી જ નવા વર્ષનું સ્વાગત થયું છે. કોર્પોરેશનના પ્રતાપે નવા વર્ષે જ મસમોટો ભુવો શહેરીજનોને ભેંટમાં મળ્યો છે.

વડોદરાવાસીઓ માટે રસ્તા પર ભુવા પડવા રોજીંદી ઘટના

ભુવા નગરી તરીકે કુખ્યાત બનેલા વડોદરા શહેરમાં ભુવા પડવા અને ખાડા પડવા એ મોટી વાત નથી. હવે તો શહેરીજનો પણ ટેવાઇ ગયા છે. કોર્પોરેશનના પ્રતાપે વડોદરાવાસીઓ માટે રસ્તા પર ભુવા પડવા રોજીંદી ઘટના બની ગઇ છે.

ભુવાએ વડોદરા કોર્પોરેશનનું માન રાખ્યું નથી

એવું લાગતું હતું કે નવા વર્ષમાં વડોદરા કોર્પોરેશન કોઇ એવુ કામ નહી કરે કે જેનાથી વડોદરાવાસીઓને હેરાનગતિ થાય પણ ભુવાએ વડોદરા કોર્પોરેશનનું માન રાખ્યું નથી અને કોર્પોરેશનની પોલ ખોલી નાંખી છે.

અકોટા મુજમહુડા રોડ પર નવા વર્ષે જ ફરી એક વાર મોટો ભુવો પડ્યો

શહેરના ભુવા રોડ તરીકે જાણીતા અકોટા મુજમહુડા રોડ પર નવા વર્ષે જ ફરી એક વાર મોટો ભુવો પડ્યો છે. નવા વર્ષે કોર્પોરેશનને મહાકાય ભુવાની ભેટ આપી દીધી છે એટલે શહેરીજનોએ સમજી લેવું જોઇએ કે આખુ વર્ષ તેમને કોર્પોરેશન આવા ભુવાની ભેંટ આપતું રહેશે.

 વહેલી તકે ભુવાનું સમારકામ કરાવવા માગ

મુજમહુડા રોડ પર મહાકાય ભુવો પડ્યો એટલે સામાજિક કાર્યકર પણ પહોંચી ગયા હતા અને શ્રીફળ વધેરીને ભુવાને આવકારવાના બદલે વિરોધ કર્યો હતો અને વહેલી તકે ભુવાનું સમારકામ કરાવવા માગ કરી હતી.