વલસાડ જિલ્લાના ધરમપુર તાલુકાના ખાંડા ગામે દીપડાના હુમલાની એક ચોંકાવનારી ઘટના સામે આવી છે. જેમાં એક શ્વાન પર દીપડાએ હુમલો કર્યો હતો. આ સમગ્ર ઘટના એક ઘરની બહાર લાગેલા સીસીટીવી કેમેરામાં કેદ થઈ છે. જેના પગલે સમગ્ર વિસ્તારમાં ભયનો માહોલ ફેલાયો છે. ધરમપુર તાલુકાના ખાંડા ગામે આવેલા એક રહેણાંક વિસ્તારમાં દીપડો ત્રાટક્યો હતો. મોડી રાત્રે દીપડો એક ઘરના આંગણા પાસે પહોંચ્યો. જ્યાં એક શ્વાન સૂતેલો હતો.
ધરમપુરના ખાંડા ગામે બની ઘટના
દીપડાએ તકનો લાભ લઈને અચાનક શ્વાન પર હુમલો કર્યો હતો. શ્વાને પોતાનો જીવ બચાવવા માટે પ્રતિકાર કરવાનો પ્રયાસ કર્યો હતો. પરંતુ દીપડાની તાકાત સામે તે લાચાર બની ગયો હતો. આ હુમલાની સમગ્ર ઘટના તે ઘરના કમ્પાઉન્ડમાં લગાવેલા સીસીટીવી કેમેરામાં સ્પષ્ટપણે જોઈ શકાય છે. સીસીટીવી ફૂટેજમાં દીપડાના હુમલાની ભયાનકતા કેદ થઈ છે. આ વીડિયો સોશિયલ મીડિયા પર વાયરલ થતાં લોકોમાં ફફડાટ ફેલાયો છે.
