Vadodra News: ચોમાસા પહેલા જ સ્થાનિકોની સમસ્યાઓ શરુ, તંત્રની ખુલી પોલ

વડોદરામાં માંજલપુર વિસ્તારમાં વરસાદી માહોલ સર્જાતા સમસ્યાઓ પેદા થવાનું શરુ થયુ છે. જેમાં રોડ-રસ્તાની સમસ્યાથી સ્થાનિકો પરેશાન થયા છે. બે મહિના પહેલા જ બનાવેલા રોડ પર ગટર અને વરસાદના પાણી ફરી વળ્યા છે. આ પાણી સમસ્યાએ વાહન ચાલકોને હેરાન કર્યા છે. પાણી ભરાવાથી વાહન વ્યવ્હારમાં મુશ્કેલી સર્જાઇ રહી છે. પ્રથમ કમોસમી વરસાદમાં જ રોડ પર પાણી ભરાતા તંત્રની પોલ ખુલી ગઇ છે.

પાણી ભરાતા વાહનચાલકોને તકલીફ

વડોદરામાં હજુ સત્તાવાર ચોમાસું શરુ થયુ નથી. તે પહેલા જ સમસ્યાઓની બૂમ સંભળાઇ રહી છે. માંજલપુર વિસ્તારમાં રોડ સમસ્યા સાથે પાણી ભરાવવાની મુશ્કેલીઓ જોવા મળી રહી છે. અહીં જુનો રોડ ખાનગી માલિકીના પાર્ટી પ્લોટવાળાને પરત કરવામાં આવ્યો હતો. નવા રોડના લેવલ નીચા હોવાથી પાણીના નિકાલની વ્યવસ્થા કરવામાં આવી ન હતી. તેથી સ્થાનિકો પરેશાન જોવા મળી હતી. વહેલી તકે પાણીના નિકાલની વ્યવસ્થા કરી રોડના લેવલ ઉંચા કરવા માટે આસપાસના વિસ્તારના લોકોએ તંત્ર પાસે માંગ કરી છે.

પાણી પહેલા બાંધો પાળ

વડોદરાના સ્થાનિકોએ જણાવ્યુ છે કે, ચોમાસુ આવશે ત્યારે અહીં જળબંબાકારની સ્થિતિ સર્જાશે. તેથી આ સ્થિતિને પહોંચી વળવા માટે હમણાથી જ કાર્યવાહી હાથ ધરવી જોઇએ. કનેક્ટિવિટી પણ નહીં રહેતા નાગરિકોને મુશ્કેલીઓનો સામનો કરવો પડે છે. રોડ-રસ્તા પર પાણી ભરાતા બાળકોને શાળાએ જવા માટે પણ સમસ્યા સર્જાઇ રહી છે. પાણી નિકાલની વ્યવસ્થા ન કરવામાં આવે તો સમસ્યાઓનો વ્યાપ વધશે.