અમરેલીમાં વરસાદથી ત્રાહિમામ, તલ-ઘઉં-ચણા-જીરૂંનો પાક નિષ્ફળ જતાં ખેડૂતોની સહાયની માગણી

• વરસાદી માવઠાથી ખેતીને અસર
  
  
• ઉભેલો પાક પલળી જતાં ખેડૂતો ચિંતાતુર
• પશુઓનો ઘાસચારો પણ પલળી ગયો

અમરેલી જિલ્લામાં હવામાન વિભાગની આગાહી અનુસાર આજે કમોસમી માવઠું પડવાથી ખેડૂતોને કુદરતે મોટી થપાટ મારી હોય તેમ જણાઈ રહ્યું છે. પહેલા ખેડૂતોને ઓછા વરસાદથી ચોમાસું પાક નિષ્ફળ ગયો હતો જેથી ખેડૂતોને શિયાળુ રવિ પાક સારો થવાની આશાએ નુકસાન ભરપાઈ થવાની આશા હતી પણ આજે કુદરતે તેને પણ ઠગારી બનાવી દીધી હતી. માહિતી પ્રમાણે ખાંભા, ઇંગોરાળા, કાંટાળા, નાનુડી સહિતના ગ્રામ્ય વિસ્તારોમાં કમોસમી માવઠું પડવાથી ખેડૂતોને તલ, સોયાબીન, ચણા, ઘઉં, જીરું અને ધાણા સહિતના પાકને નુકસાન પહોચ્યું હતું અને પશુઓનો ચારો પણ પલળી ગયો હતો. આમ આ વરસાદે જગતના તાતના માથે મુશ્કેલીના વાદળો ઉભા કરી દીધા છે.

અમરેલી જિલ્લાના ખાંભા તાલુકા તેમજ તેના ગ્રામ્ય વિસ્તારમાં આજે વહેલી સવારે ધોધમાર વરસાદ પડવાથી તલ અને સોયાબીનના પાકને મોટું નુકસાન પહોચ્યું હતું તેમજ શિયાળુ રવિ પાકને પણ ભારે નુકસાનની ભીતિ ખેડૂતોમાં સેવાઈ હતી. ઇંગોરાળા ગામના ખેડૂતો માથે અચાનક આફત આવી પડી હતી અને ખેડૂતોએ ચોમાસું તલનું વાવેતર કર્યું હતું અને તલનો પાક તૈયાર હતો ત્યારે અચાનક કમોસમી માવઠાથી તલનો પાક પલળી જતાં નાશ પામ્યો હતો. આ ઉપરાંત ખેડૂતોનો પશુઓ માટે રાખવામાં આવેલો ઘાસચારો પણ પલળી ગયો હતો, અને ખેડૂતોને હવે પોક મૂકીને રોવાનો વારો આવ્યો હતો.

ખાંભા ગીરના ગ્રામ્ય વિસ્તારમાં અચાનક જ કમોસમી વરસાદ વહેલી સવારે પડવાથી ખેડૂતોને ખેતીના પાકમાં વ્યાપક નુકસાન પહોંચ્યું છે. ત્યારે ઇંગોરાળા ગામના ખેડૂત વિહાભાઇ રબારી એ 6 વિઘાના તલ વાવ્યા હતા અને તલનો પાક તૈયાર હતો અને વહેલી સવારે પડેલા ધોધમાર વરસાદને પગલે તલનો પાક ધોવાઈ ગયો હતો અને તલ આડા પડી ગયા હતા અને ખેડૂતને ભારે નુકસાન થયું હતું ત્યારે ખેડૂત દ્વારા સરકાર પાસે નુકસાનીના સર્વેની આશા રાખી યોગ્ય કરવા માંગ કરી હતી. આ ઉપરાંત આસપાસના પંથકમાં કપાસ, ચણા અને એરંડાના પાકને પણ આ વરસાદની અસર જોવાઈ હતી અને ઉભેલો પાક પલળી જતા ખેડૂતોને નુકસાન સહન કરવાનો વારો આવ્યો છે.

અમરેલી જિલ્લામાં ખેડૂતોએ રવિ પાક પર થોડી આશા હતી પણ આજે વેહલી સવારે કમોસમી માવઠું જાણે કહેર બની આવ્યું હોય તેમ ખેડૂતના રવિ પાક ઘઉં , ચણા તેમજ જીરું સહિતનો પાકને નુકસાન થવાથી ખેડૂતો ચિંતાતુર બન્યા છે. તેમજ ખેડૂતોનો પશુઓ માટેનો ચારો પણ પલળી જતાં ધરતીપુત્રોને પોક મૂકીને રડવાનો જાણે કે વારો આવ્યો છે.