Mamta Benarji: રાષ્ટ્રીય હિત માટે ટીએમસી કેન્દ્ર સરકારના સમર્થનમાં

તૃણમૂલ કોંગ્રેસ રાષ્ટ્રીય હિતમાં કેન્દ્રના દરેક નિર્ણયને સમર્થન આપશે. તેમણે ભારતના પગલાંઓથી વિશ્વને વાકેફ કરવા માટે મોકલવામાં આવી રહેલા પ્રતિનિધિમંડળોનું પણ સ્વાગત કર્યું.

પશ્ચિમ બંગાળના મુખ્યમંત્રી મમતા બેનર્જીએ કેન્દ્ર સરકારને પાકિસ્તાન સાથેના તણાવ અને "ઓપરેશન સિંદૂર" અંગે દેશને માહિતી આપવા માટે સંસદનું ખાસ સત્ર બોલાવવા વિનંતી કરી છે. તેમણે કહ્યું કે દેશની સાર્વભૌમત્વની રક્ષા અને રાષ્ટ્રીય હિતમાં કેન્દ્ર જે પણ નિર્ણય લેશે, તૃણમૂલ કોંગ્રેસ હંમેશા તેની સાથે રહેશે.

સરકારે સંસદનું ખાસ સત્ર બોલાવવું જોઈએ

તેમણે કહ્યું કે, "હું કેન્દ્રને અપીલ કરું છું કે પ્રતિનિધિમંડળોના સુરક્ષિત પરત ફર્યા પછી સંસદનું ખાસ સત્ર બોલાવવામાં આવે, કારણ કે મારું માનવું છે કે દેશના લોકોને તાજેતરના તણાવ અને વર્તમાન પરિસ્થિતિ વિશે પહેલા જાણવાનો અધિકાર છે."

સોશિયલ મીડિયામાં કરી પોસ્ટ

શુક્રવારે મમતાએ સોશિયલ સાઇટ X પર લખ્યું, "આતંકવાદ સામે વિશ્વ સમુદાય સુધી પહોંચવા માટે સર્વપક્ષીય પ્રતિનિધિમંડળો વિવિધ દેશોમાં જઈ રહ્યા છે. મને આ જોઈને આનંદ થાય છે. મેં હંમેશા કહ્યું છે કે દેશના હિતો અને આપણી સાર્વભૌમત્વની રક્ષા માટે કેન્દ્ર ગમે તે પગલાં લેશે, તૃણમૂલ તેની સાથે ઊભું રહેશે." 

પાકિસ્તાની સેનાના ડીજીએમઓની વિનંતી બાદ યુદ્ધવિરામ

ભારતના ઓપરેશન સિંદૂર બાદ, પાકિસ્તાને સરહદ પર કોઈ ઉશ્કેરણી વિના ગોળીબાર ફરી શરૂ કર્યો. મિસાઇલ છોડવામાં આવી. ભારતીય સેનાએ દરેક હુમલાને નિષ્ફળ બનાવ્યો. ૧૦ મેના પાકિસ્તાની સેનાના ડીજીએમઓએ ભારતના ડીજીએમઓને ફોન કર્યો અને બંને દેશો યુદ્ધવિરામ પર સંમત થયા.