- કેન્દ્રીય ગૃહમંત્રી અમિત શાહના એડિટેડ વીડિયોનો મામલો
- દિલ્હી પોલીસ છે એક્શનમાં, સતત કરી રહી છે તપાસ
- સોશિયલ મીડિયા હેન્ડલ પર ખાસ નજર
લોકસભાની ચૂંટણીને લઇને રાજકીય દિગ્ગજો પ્રચારમાં વ્યસ્ત બન્યા છે. સોશિયલ મીડિયા પ્રચારનુ ઉત્તમ માધ્યમ બની રહ્યુ છે. પરંતુ તેનો દુરુપયોગ પણ એટલો જ થઇ રહ્યો છે. ત્યારે અમિત શાહનો એક ફેક વીડિયો સામે આવ્યો છે. જેને લઇને દિલ્હી પોલીસ એક્શનમાં આવી છે.
શું કરવામાં આવી કાર્યવાહી ?
કેન્દ્રીય ગૃહમંત્રી અમિત શાહના એડિટેડ વીડિયો કેસમાં તપાસ તેજ કરવામાં આવી છે. આ કેસમાં તપાસનો વ્યાપ વધ્યો છે. તેલંગાણામાં 5 નેતાઓને નોટિસ આપવામાં આવી છે. એડિટેડ વીડિયો કેસમાં ઘણા રાજ્યોના લોકો સામેલ છે. જેના કારણે તપાસનો વ્યાપ અન્ય રાજ્યોમાં પણ વિસ્તર્યો છે. મળતી માહિતી મુજબ, દિલ્હી પોલીસ આ કેસની તપાસ માટે રાંચી, રાજસ્થાન અને મધ્યપ્રદેશ પણ જશે. સાથે જ દિલ્હી પોલીસની એક ટીમ આસામ જઈને ધરપકડ કરાયેલા આરોપીઓની પૂછપરછ કરી શકે છે.
રેવંત રેડ્ડીને સમન્સ
દિલ્હી પોલીસે અમિત શાહ પર નકલી વીડિયો કેસમાં તેલંગાણાના મુખ્યમંત્રી રેવંત રેડ્ડીને પણ સમન્સ મોકલ્યું છે. તેઓને પૂછપરછ માટે બોલાવવામાં આવ્યા છે. દિલ્હી પોલીસના સ્પેશિયલ સેલના સાયબર યુનિટે તેલંગાણામાં પાંચ લોકોની ઓળખ કરી છે તેઓની પણ પૂછપરછ કરી શકે છે. આ ઉપરાંત આ કેસમાં આસામમાંથી એક આરોપીની ધરપકડ કરવામાં આવી છે. આસામના મુખ્યમંત્રી હિમંતા બિસ્વા શર્માએ સોશિયલ મીડિયા પર આ માહિતી આપી છે. તમને જણાવી દઈએ કે ધરપકડ કરાયેલા આરોપીનું નામ રિતમ સિંહ છે.
હાઇલેવલની મળી હતી બેઠક
અમિત શાહ સાથે જોડાયેલા ફેક વીડિયોને લઈને સોમવારે દિલ્હી પોલીસ હેડક્વાર્ટરમાં એક ઉચ્ચ સ્તરીય બેઠક યોજાઈ હતી. આમાં દિલ્હી પોલીસના ઘણા વરિષ્ઠ અધિકારીઓ સામેલ હતા. આ બેઠકમાં સાયબર વિંગના વરિષ્ઠ અધિકારીઓ પણ હાજર રહ્યા હતા. જે સોશિયલ મીડિયા હેન્ડલ દ્વારા શાહનો ફેક વીડિયો શેર કરવામાં આવ્યો છે તેના વિરુદ્ધ નોટિસ પાઠવવામાં આવશે અને દિલ્હી પોલીસ તેની પૂછપરછ કરશે.
વિડિઓ ખોટી રીતે સંપાદિત કરવામાં આવી હતી
દિલ્હી પોલીસે રવિવારે વીડિયો ટેમ્પરિંગને લઈને કેસ નોંધ્યો હતો અને તપાસ શરૂ કરી હતી. પોલીસે IPC કલમ 153, 153A, 465,469, 66 IT એક્ટ હેઠળ કેસ નોંધ્યો છે. તમને જણાવી દઈએ કે તેલંગાણામાં એક ચૂંટણી રેલીમાં અમિત શાહે એસસી-એસટી અને ઓબીસી આરક્ષણ ચાલુ રાખવાની વાત કરી હતી, પરંતુ એક ફેક વીડિયોમાં તેને ખતમ કરવાની વાત કરવામાં આવી હતી અને તેને વાયરલ કરવામાં આવ્યો હતો. બીજેપી આઈટી સેલના વડા અમિત માલવિયાએ અમિત શાહનો વીડિયો એડિટ કર્યો છે અને તેને ખોટી રીતે બતાવી રહ્યા છે.
