Amit Shah fake video મામલે એક આરોપીની ધરપકડ, આસામના CMએ આપી માહિતી

• અમિત શાહના નકલી વીડિયો કેસમાં આરોપી રિતમસિંહની ધરપકડ
  
• આસામના CM હિમંતા બિસ્વા શર્માએ ટ્વિટ કરીને આપી માહિતી
•  દિલ્હી પોલીસે નકલી વીડિયો પોસ્ટ કરનારા લોકો વિરુદ્ધ FIR નોંધી

કેન્દ્રીય ગૃહમંત્રી અમિત શાહ સાથે જોડાયેલા નકલી વીડિયોના મામલામાં એક આરોપીની ધરપકડ કરવામાં આવી છે. આસામના મુખ્યમંત્રી હિમંતા બિસ્વા શર્માએ ટ્વીટ કરીને આ જાણકારી આપી છે. ધરપકડ કરાયેલા આરોપીનું નામ રિતમ સિંહ છે. 

ફેક વીડિયો કેસમાં ગૃહ મંત્રાલય ગંભીર

કેન્દ્રીય મંત્રીનો એક વીડિયો સોશિયલ મીડિયા પર ઝડપથી વાયરલ થઈ રહ્યો છે, જેમાં તેની સાથે છેડછાડ કરવામાં આવી છે. એક દિવસ પહેલા રવિવારે દિલ્હી પોલીસના સ્પેશિયલ સેલે સોશિયલ મીડિયા પર શાહનો નકલી વીડિયો પોસ્ટ કરનારા લોકો વિરુદ્ધ FIR નોંધી છે. મીડિયા રિપોર્ટ્સ અનુસાર, ગૃહ મંત્રાલયે આ મામલાને ગંભીરતાથી લીધો છે. સ્પેશિયલ સેલ તે એકાઉન્ટ્સ પર નજર રાખી રહ્યું છે જે આ વીડિયો પોસ્ટ કરી રહ્યા છે. વીડિયો ડિલીટ કરનારાઓ પણ તપાસ એજન્સીઓના રડાર પર છે.

અમિત માલવિયાએ કહ્યું- કાર્યવાહી માટે તૈયાર રહો

ભાજપે પણ આ વીડિયો સામે ફરિયાદ નોંધાવી છે. ફરિયાદમાં ભાજપે કહ્યું છે કે અમિત શાહે એસસી-એસટી અને ઓબીસી અનામત નાબૂદ કરવા અંગે કંઈ કહ્યું નથી. વાયરલ થયેલો વિડીયો સંપૂર્ણપણે નકલી છે. તેના વીડિયો સાથે છેડછાડ કરવામાં આવી રહી છે. ભાજપનું કહેવું છે કે મૂળ વીડિયોમાં શાહે તેલંગાણામાં મુસ્લિમો માટે ગેરબંધારણીય આરક્ષણ હટાવવાની વાત કરી હતી. આ મામલે બીજેપી આઈટી સેલના વડા અમિત માલવિયાએ કહ્યું કે જેણે પણ ફેક વીડિયો શેર કર્યો છે તે કાર્યવાહી માટે તૈયાર રહે. 

દિલ્હી પોલીસનું એલર્ટ

દિલ્હી પોલીસ આ મામલે સક્રિય થઈ છે. પોલીસે એક્સ અને ફેસબુકને પત્ર લખ્યો છે. પત્રમાં તેણે માહિતી માંગી છે કે બંને સોશિયલ મીડિયા પ્લેટફોર્મ પરથી ગૃહમંત્રી શાહનો નકલી વીડિયો કોણે શેર કર્યો છે.