ભાજપે ઝારખંડ વિધાનસભા ચૂંટણીના પ્રથમ તબક્કા માટે સ્ટાર પ્રચારકોની યાદી કરી જાહેર

આ યાદીમાં વડાપ્રધાન નરેન્દ્ર મોદી, કેન્દ્રીય મંત્રી જે.પી. નડ્ડા, કેન્દ્રીય ગૃહ મંત્રી અમિત શાહ, રાજનાથ સિંહ, નીતિન ગડકરી, શિવરાજ સિંહ ચૌહાણ, આસામના મુખ્યમંત્રી હિમંતા બિસ્વા સરમા, ઉત્તરપ્રદેશના મુખ્યમંત્રી યોગી આદિત્યનાથ સહિત અનેક નેતાઓના નામ સામેલ છે.

ભાજપે ઝારખંડમાં ચૂંટણી પ્રચારને વધુ તેજ બનાવ્યો છે. પાર્ટીએ હરિયાણા સિવાય મધ્યપ્રદેશ, છત્તીસગઢ અને રાજસ્થાનની રણનીતિ અપનાવવાનો નિર્ણય કર્યો છે. પાર્ટીએ નક્કી કર્યું છે કે આ વખતે વિધાનસભાની ચૂંટણી કોઈ એક નેતાના નેતૃત્વમાં નહીં પરંતુ સામૂહિક નેતૃત્વ હેઠળ લડવામાં આવશે.

ઝારખંડમાં ચૂંટણી પ્રચારનું નેતૃત્વ આ બે નેતાના ખભા પર

રાજ્યમાં ચૂંટણી પ્રચારનું નેતૃત્વ કેન્દ્રીય કૃષિ મંત્રી શિવરાજ સિંહ ચૌહાણ અને આસામના સીએમ હિમંતા બિસ્વા સરમા કરી રહ્યા છે. રાજ્યમાં ચૂંટણી વ્યૂહરચના લાગુ કરવાનું કામ આ બન્ને નેતાઓના ખભા પર છે. આ બન્ને નેતાઓ પાર્ટી હાઈકમાન્ડને રાજ્ય સંગઠનની દરેક ક્ષણની માહિતી આપી રહ્યા છે.

બે તબક્કામાં મતદાન, 23મીએ પરિણામ

ચૂંટણી પંચે ઝારખંડની 81 વિધાનસભા બેઠકો માટે બે તબક્કામાં ચૂંટણી કરાવવાનો નિર્ણય લીધો છે. પ્રથમ તબક્કા માટે 13મી નવેમ્બરે અને બીજા તબક્કા માટે 20મી નવેમ્બરે મતદાન થશે. આ પછી 23 નવેમ્બરે ચૂંટણીના પરિણામો જાહેર થશે. મહારાષ્ટ્ર વિધાનસભા ચૂંટણીના પરિણામો પણ એ જ દિવસે જાહેર થશે.