Budget 2024: સંસદમાં ક્યારે રજૂ થશે બજેટ? કેન્દ્રીયમંત્રી કિરણ રિજિજુએ જણાવી તારીખ

• બજેટ સત્રની 22 જુલાઇએ શરૂઆત
  
• 12 ઓગષ્ટ સુધી ચાલશે બજેટ સત્ર
• કિરણ રિજિજુએ આપી માહિતી

કેન્દ્રીય સંસદીય કાર્યમંત્રી કિરણ રિજિજૂએ આગામી બજેટ સત્રની જાહેરાત કરી દીધી છે. નાણાકીય વર્ષ 2024-25 માટેનું કેન્દ્રીય બજેટ 23 જુલાઈએ લોકસભામાં રજૂ કરવામાં આવશે. સંસદનું બજેટ સત્ર 22 જુલાઈથી 12 ઓગસ્ટ વચ્ચે યોજાવાનું છે. આ અંગે કેન્દ્રીય મંત્રી કિરણ રિજિજુએ ટ્વીટ કરીને માહિતી આપી છે.

કિરણ રિજિજૂએ આપી માહિતી

 કેન્દ્રીય મંત્રી કિરેન રિજિજુએ એક્સ પર પોસ્ટ કરતા કહ્યું કે 22 જુલાઇએ બજેટ સત્ર શરૂ થશે જે 12 ઑગષ્ટ સુધી ચાલશે. જ્યારે 23 જુલાઇએ બજેટ રજૂ કરાશે. મહત્વનું છે કે નાણા મંત્રી નિર્મલા સીતારમણે ફેબ્રુઆરીમાં વચગાળાનું બજેટ રજૂ કર્યું હતું. તેઓ આજે સતત સાતમું બજેટ રજૂ કરશે. આમ કરનાર તેઓ ઇતિહાસમાં પ્રથમ મહિલા નાણામંત્રી હશે. એવી અપેક્ષા રાખવામાં આવે છે કે નાણાં પ્રધાન નિર્મલા સીતારમણ મોદી 3.0 સરકારના વિકસિત ભારત પર ધ્યાન કેન્દ્રિત કરીને નાણાકીય વર્ષ 25 માટેનું બજેટ રજૂ કરશે.

પીએમના ત્રીજા કાર્યકાળનું પ્રથમ બજેટ

કેન્દ્રીય નાણાં પ્રધાન નિર્મલા સીતારમણે તાજેતરમાં કહ્યું હતું કે કેન્દ્ર સરકાર દેશના નાગરિકોના જીવનને સુધારવા માટે સમર્પિત છે અને આ માટે સતત પ્રયાસો કરતી રહેશે. લોકસભા ચૂંટણી 2024 બાદ 24 જૂનથી સંસદના વિશેષ સત્રનું આયોજન કરવામાં આવ્યું હતું. જ્યાં નવા સંસદ સભ્યોએ શપથ લીધા અને 27 જૂને રાષ્ટ્રપતિ દ્રૌપદી મુર્મુએ સંસદના સંયુક્ત સત્રને સંબોધિત કર્યું હતું. મહત્વનું છે કે નરેન્દ્ર મોદીના ત્રીજા કાર્યકાળ દરમિયાન રજૂ કરવામાં આવેલું આ પહેલું બજેટ હશે. બજેટથી વધુ અપેક્ષાઓ રાખવામાં આવી રહી છે કારણ કે રાષ્ટ્રપતિ દ્રૌપદી મુર્મુએ તેમના સંયુક્ત સંબોધનમાં કહ્યું હતું કે આ વખતે ઘણા ઐતિહાસિક પગલાં જોવા મળશે. તેમણે વિવિધ ક્ષેત્રોમાં ઝડપી સુધારાની પણ વાત કરી હતી.