- બંગાળની ખાડીમાંથી ઉદ્ભવેલુ મિધિલી નબળુ પડ્યુ
- શનિવાર સુધીમાં ટકરાય તેવી સ્થિતિ હતી
- હાલ ઓછા દબાણના ક્ષેત્રમાં પરિવર્તિત
બંગાળની ખાડીમાંથી ઉદ્ભવેલુ ચક્રવાત મિધિલી ધીમુ પડી ગયુ છે. શનિવાર સવાર સુધીમાં ટકરાય તેવી સ્થિતિ હતી પરંતુ હવે ચક્રવાત હળવા દબાણના ક્ષેત્રમાં પરિવર્તિત થઇ ગયુ છે. ચક્રવાતને લઇને ત્રિપુરા અને મિઝોરમમાં વરસાદની સંભાવના હતી પરંતુ હાલ વાતાવરણ સાફ જોવા મળી રહ્યું છે. ચક્રવાતી વાવાઝોડું નબળું પડીને ડીપ ડિપ્રેશન અને પછી ડિપ્રેશન એરિયામાં ફેરવાઈ ગયું છે અને ત્રિપુરાની રાજધાની અગરતલાથી 50 કિલોમીટર પૂર્વ અને દક્ષિણપૂર્વમાં સ્થિત છે.
દરિયો ખેડવાનું ટાળ્યુ
મિઝોરમમાં આકાશ સ્વચ્છ રહ્યું, જ્યારે ત્રિપુરામાં વાદળછાયું રહ્યું, પરંતુ શનિવારની શરૂઆતથી કોઈપણ રાજ્યોમાં વરસાદ પડ્યો નથી. હજુ સુધી કોઈ નુકસાનના અહેવાલ નથી. શુક્રવારે પશ્ચિમ બંગાળના દક્ષિણ 24 પરગણા જિલ્લાના સુંદરબન ક્ષેત્રમાં હળવો વરસાદ થયો હતો, પરંતુ શનિવારે વરસાદ પડ્યો ન હતો. જો કે, હવામાન વિભાગની સલાહ મુજબ માછીમારોએ દરિયો ખેડવાનું ટાળ્યુ હતું.
ઓછા દબાણના ક્ષેત્રમાં ફેરવાશે
શનિવારે સવારે IMD દ્વારા જારી કરવામાં આવેલા બુલેટિનમાં કહેવામાં આવ્યું છે કે ત્રિપુરા અને તેની નજીકના બાંગ્લાદેશ પર રચાયેલ ડીપ ડિપ્રેશન ડિપ્રેશનમાં નબળું પડી ગયું છે અને અગરતલાથી લગભગ 50 કિમી પૂર્વમાં છે. દક્ષિણપૂર્વ અને સિલચરથી 160 કિલોમીટર દક્ષિણ પશ્ચિમમાં સ્થિત છે. તે આગામી છ કલાક દરમિયાન દક્ષિણ આસામ અને તેની આસપાસના મિઝોરમ-ત્રિપુરામાં ઓછા દબાણના વિસ્તારમાં ફેરવાશે.
વરસાદની સંભાવના
તો આ તરફ તમિલનાડુમાં ભારે વરસાદ થયો છે. પૂર્વી મેઘાલયમાં 18 નવેમ્બરે વરસાદની સંભાવના હતી. આ સિવાય તમિલનાડુના દરિયાકાંઠાના વિસ્તારોમાં 20 નવેમ્બર સુધી વરસાદ પડી શકે છે. આ સિવાય કેરળમાં પણ ભારે વરસાદ પડી શકે છે.
