- EDએ મનીષ સિસોદિયાની જેલમાં બીજીવાર કરી હતી પૂછપરછ
- EDએ પૂછપરછ બાદ કરી મનીષ સિસોદિયાની ધરપકડ
- આ પહેલા મંગળવારે EDએ જેલમાં સિસોદિયાની પૂછપરછ કરી હતી
દિલ્હીના પૂર્વ ડેપ્યુટી સીએમ મનીષ સિસોદિયાની ED દ્વારા ધરપકડ કરવામાં આવી છે. EDએ આજે દિલ્હી એક્સાઇઝ પોલિસી કેસમાં કથિત અનિયમિતતાઓને લગતા મની લોન્ડરિંગ કેસમાં તિહાર જેલમાં સિસોદિયાની બીજી વખત પૂછપરછ કરી હતી. આ પહેલા મંગળવારે EDએ જેલમાં સિસોદિયાની પૂછપરછ કરી હતી.
સીબીઆઈએ 26 ફેબ્રુઆરીએ મનીષ સિસોદિયાની ધરપકડ કરી હતી. દિલ્હી કોર્ટે સોમવારે તેને 20 માર્ચ સુધી ન્યાયિક કસ્ટડીમાં મોકલી દીધો હતો. CBI કેસમાં મનીષ સિસોદિયાના જામીનની સુનાવણી પણ શુક્રવારે થવાની છે.
સિસોદિયાની જેલમાં બે વખત પૂછપરછ કરવામાં આવી
આ પહેલા મંગળવારે EDના અધિકારીઓ પ્રિવેન્શન ઓફ મની લોન્ડરિંગ એક્ટ હેઠળ સિસોદિયાનું નિવેદન રેકોર્ડ કરવા તિહાર જેલમાં પહોંચ્યા હતા. EDએ સિસોદિયાની પૂછપરછ કરવા માટે કોર્ટ પાસેથી પરવાનગી લીધી હતી. જો તપાસ અધિકારીને એવું લાગે કે તે વ્યક્તિ મની લોન્ડરિંગના ગુના માટે દોષિત છે, તો ED PMLAની કલમ 19 લાગુ કરી શકે છે, જે તેને કેસમાં સામેલ વ્યક્તિઓ અથવા આરોપીઓની ધરપકડ કરવાની મંજૂરી આપે છે.
તેલંગાણાના મુખ્યમંત્રી કે ચંદ્રશેખર રાવની પુત્રી કવિતાની પણ આજે આ જ કેસમાં પૂછપરછ થવાની હતી, પરંતુ તેણે EDને 11 માર્ચે હાજર રહેવા વિનંતી કરી હતી, જેને કેન્દ્રીય એજન્સીએ સ્વીકારી હતી. BRS નેતા કવિતાએ દિલ્હીમાં કહ્યું કે અમે એન્ફોર્સમેન્ટ ડિરેક્ટોરેટનો સામનો કરીશું, અમે કંઈ ખોટું કર્યું નથી. કવિતા આજે જ દિલ્હી પહોંચી છે. તેણે કહ્યું કે હું 11 માર્ચે નવી દિલ્હીમાં ED સમક્ષ હાજર થઈશ. આ અઠવાડિયાની શરૂઆતમાં, તેણે કહ્યું હતું કે તે તપાસ એજન્સીને સંપૂર્ણ સહકાર આપશે, પરંતુ મહિલા આરક્ષણ બિલના સમર્થનમાં દિલ્હીમાં 10 માર્ચે પ્રસ્તાવિત ધરણાને ધ્યાનમાં રાખીને તેણીના નિવેદનની તારીખ પર કાનૂની અભિપ્રાય માંગશે.
