ઉત્તર પ્રદેશના ફિરોઝાબાદમાં આગરા-લખનૌ એક્સપ્રેસ વે પર એક ભયાનક માર્ગ અકસ્માત થયો છે. ફિરોઝાબાદના નસીરપુર પોલીસ સ્ટેશન હેઠળના કિલોમીટર નંબર 49 કટ પાસે એક પ્રવાસી બસ અકસ્માતનો ભોગ બની છે. મુંડન સંસ્કાર કરીને મથુરાથી પરત ફરી રહેલા લોકોથી ભરેલી બસ એક ડમ્પર સાથે અથડાઈ હતી. આ અકસ્માતમાં 5 લોકોના મોત થયા છે.
5 થી વધુ લોકો ઘાયલ થયા છે, જેમને જિલ્લા હોસ્પિટલમાં દાખલ કરવામાં આવ્યા છે. ઘાયલોમાં એકની હાલત ગંભીર હોવાથી તેને આગરા મેડિકલ કોલેજમાં મોકલવામાં આવ્યો છે. ફિરોઝાબાદમાં આ પહેલા શુક્રવારે બપોરે એક અકસ્માત થયો હતો અને આ અકસ્માત નસીરપુર કટ પર થયો હતો, જેમાં 3 લોકોના મોત થયા હતા. ફિરોઝાબાદમાં ગઈકાલે થયેલા અકસ્માતોમાં 11 લોકોના મોત થયા હતા.
ડ્રાઇવરને ઝોકું આવી જવાને કારણે અકસ્માત થયો હોવાની આશંકા
મીડિયા રિપોર્ટ અનુસાર, લખનૌનો એક પરિવાર મથુરામાં પોતાના બાળકની મુંડન વિધિ કરાવીને ઘરે પરત ફરી રહ્યો હતો ત્યારે રસ્તામાં તેનો અકસ્માત થયો હતો. ઘાયલોએ પોલીસને આપેલા તેમના નિવેદનમાં જણાવ્યું હતું કે બસ ડ્રાઈવર ઊંઘી જવાને કારણે આ અકસ્માત થયો હતો. સૂઈ જવાને કારણે સંતુલન ખોરવાઈ ગયું અને બસ એક્સપ્રેસ વે પર પાર્ક કરેલા ડમ્પરમાં પાછળથી અથડાઈ. ટક્કર એટલી જોરદાર હતી કે બસ પાછળથી ઊંચકાઈ ગઈ અને બધા એકબીજાની ઉપર પડી ગયા.
3 લોકોના ઘટનાસ્થળે જ મોત થયા હતા
જેમાં 3 લોકોના ઘટનાસ્થળે જ મોત થયા હતા. હોસ્પિટલમાં સારવાર દરમિયાન 2 યુવકોના મોત થયા હતા. ઇજાગ્રસ્તોએ જાતે જ પોલીસને અકસ્માતની જાણ કરી હતી. માહિતી મળતા જ પોલીસ સ્ટેશન અને ઉચ્ચ અધિકારીઓ ઘટના સ્થળે પહોંચી ગયા હતા. રાહદારીઓએ બચાવ કામગીરી હાથ ધરી ઘાયલોને બસમાંથી બહાર કાઢ્યા હતા. ઘાયલોને એમ્બ્યુલન્સ મારફતે હોસ્પિટલ લઈ જવામાં આવ્યા હતા. પોલીસે મૃતદેહોને પોતાના કબજામાં લઈ પોસ્ટમોર્ટમ માટે મોકલી આપ્યા છે. પોલીસે કેસ નોંધીને તપાસ શરૂ કરી છે.
બસ પાછળથી ઉભેલા ડમ્પરમાં અથડાઈ હતી
નસીરપુર જિલ્લા ફિરોઝાબાદ પોલીસ સ્ટેશનથી પ્રાપ્ત માહિતી અનુસાર, આગ્રાથી લખનૌ જઈ રહેલી એક ટ્રાવેલર બસ નંબર (UP 32 WN 1966) પાછળથી રસ્તાના કિનારે ઉભેલા ડમ્પર નંબર (RJ 05 GV 9156) સાથે અથડાઈ હતી. આ અકસ્માતમાં 3 પુરૂષો અને 2 મહિલાઓના મોત થયા હતા. મૃતકોની ઓળખ કરી લેવામાં આવી છે
