- ગેસ સિલિન્ડરમાં લીકેજ થતા ઘરમાં પ્રચંડ આગ
- ગાઝિયાબાદના ટીલા મોડ પોલીસ સ્ટેશન વિસ્તારની ઘટના
- ઘટનમાં પરિવારના 7 સભ્યો દાઝ્યા, 3ના સારવાર દરમિયાન મોત
ગાઝિયાબાદના ટીલા મોડ પોલીસ સ્ટેશન વિસ્તારમાં રવિવારે એક હૃદયદ્રાવક ઘટના સામે આવી છે. ગેસ સિલિન્ડરમાં લીકેજના કારણે ઘરમાં પ્રચંડ આગ લાગવાને કારણે પરિવારના 7 સભ્યો ખરાબ રીતે દાઝી ગયા હતા, જેમાંથી ત્રણ લોકોના મોત થયા હતા. મળતી માહિતી મુજબ, ટીલા મોડ પોલીસ સ્ટેશન વિસ્તારના ડિફેન્સ કોલોની વિસ્તારમાં નિર્માણાધીન મકાનમાં ગેસ સિલિન્ડરમાં લીકેજ થયું હતું, જેના કારણે આગ લાગી હતી.
થોડી જ વારમાં આગ આખા ઘરમાં ફેલાઈ ગઈ. આ દરમિયાન ઘરમાં સાત લોકો હાજર હતા જે આગને કારણે ગંભીર રીતે દાઝી ગયા હતા. માહિતી બાદ પોલીસ ઘટનાસ્થળે પહોંચી અને તમામ સાત લોકોને દિલ્હીની જીટીબી હોસ્પિટલમાં દાખલ કર્યા. મૃતકોમાં એક મહિલા અને તેની બે પુત્રીઓનો સમાવેશ થાય છે. એસીપી સિદ્ધાર્થ ગૌતમે જણાવ્યું કે આ ઘટના રવિવારે બપોરે 12 વાગ્યાની આસપાસ બની હતી, જેમાં દાઝી ગયેલા ત્રણ લોકોના મોત થયા હતા. અન્ય ચાર લોકોની હોસ્પિટલમાં સારવાર ચાલી રહી છે. આગ એટલી ઝડપથી ફેલાઈ હતી કે ઘરમાં હાજર લોકોને બહાર નીકળવાની તક મળી ન હતી. ઘટના દરમિયાન આસપાસના લોકોએ પણ આગ ઓલવવાનો પ્રયાસ કર્યો હતો.
