J&K: સુરક્ષા દળોને મળી સફળતા, હથિયારો-વિસ્ફોટક સામગ્રી સાથે 2 આતંકીના મદદગાર ઝડપાયા

• આજે કલમ 370 હટાવવાની 5મી વર્ષગાંઠ
  
• સુરક્ષા દળો અને જમ્મુ-કાશ્મીર પોલીસ એલર્ટ
• વિસ્ફોટક સામગ્રી સાથે 2 આતંકીના મદદગારની ધરપકડ

આજે કલમ 370 હટાવવાની 5મી વર્ષગાંઠ છે. આ અવસર પર સુરક્ષા દળો અને જમ્મુ-કાશ્મીર પોલીસ સમગ્ર કેન્દ્રશાસિત પ્રદેશમાં હાઈ એલર્ટ પર છે. દરેક ખૂણા પર નજર રાખવામાં આવી રહી છે અને સર્ચ ઓપરેશન હાથ ધરવામાં આવી રહ્યું છે. આ દરમિયાન સુરક્ષા દળોને મોટી સફળતા મળી છે.

આ મામલાની માહિતી આપતા અધિકારીઓએ જણાવ્યું કે સુરક્ષા દળોએ સોમવારે પુલવામા જિલ્લાના પંજગામ વિસ્તારમાં બે આતંકવાદી સહયોગીઓની ધરપકડ કરી હતી. તેમની પાસેથી એક પિસ્તોલ અને બે મેગેઝીન સહિત હથિયાર અને દારૂગોળો પણ મળી આવ્યો છે. તેમણે કહ્યું કે આ સંદર્ભે કેસ નોંધવામાં આવ્યો છે અને વધુ તપાસ શરૂ કરવામાં આવી છે.

નોંધનીય છે કે, 5 ઓગસ્ટ 2019 ના રોજ ભારત સરકાર દ્વારા કલમ 370 નાબૂદ કરવાની વર્ષગાંઠને કારણે, સમગ્ર કાશ્મીરમાં, ખાસ કરીને બારામુલ્લામાં સુરક્ષા હાઇ એલર્ટ પર છે. કલમ 370 ભારત સરકારના કોઈપણ નિર્ણયને જમ્મુ-કાશ્મીરમાં લાગુ થવાથી રોકે છે. જમ્મુ અને કાશ્મીર ભારતનું અભિન્ન અંગ છે, તે માત્ર કહેવાની વાત હતી. જેના કારણે કાશ્મીર ઘાટીના કેટલાક પરિવારો અમીર બની રહ્યા હતા. ખીણમાં અલગતા તેની ટોચ પર હતી. આ કારણે આતંકવાદ પણ મોટી સમસ્યા બની રહ્યો. જો કે, કલમ 370 હટાવવા દરમિયાન વિપક્ષે સંસદના બંને ગૃહોમાં હંગામો મચાવ્યો હતો. પરંતુ તેમ છતાં કેન્દ્રીય ગૃહમંત્રી અમિત શાહે તેને ગૃહમાં રજૂ કર્યો હતો.