જમ્મુ-કાશ્મીરના રામબનમાં રક્ષા મંત્રી રાજનાથ સિંહે મોટું નિવેદન આપ્યું છે. તેમણે કહ્યું કે, પાકિસ્તાન અધિકૃત કાશ્મીર (PoK)ના રહેવાસીઓએ ભારતમાં જોડાવું જોઈએ, અમે તેમને પોતાના ગણીએ છીએ. રામબનમાં એક ચૂંટણી રેલીને સંબોધિત કરતી વખતે રાજનાથે આ નિવેદન આપ્યું હતું.
જ્યાં સુધી ભાજપ છે ત્યાં સુધી કલમ 370ને કોઈ પુનઃસ્થાપિત કરી શકશે નહીં: રાજનાથ
રાજનાથે કહ્યું કે, કોંગ્રેસ-નેકાં ગઠબંધન કહે છે કે તે કલમ 370ને પુનઃસ્થાપિત કરશે પરંતુ જ્યાં સુધી ભાજપ છે ત્યાં સુધી કોઈ એવું કરી શકશે નહીં. તેમણે કહ્યું કે, જમ્મુ-કાશ્મીરમાં સ્થિતિ બદલાઈ ગઈ છે, યુવાનો પાસે હવે પિસ્તોલ અને રિવોલ્વરને બદલે લેપટોપ અને કોમ્પ્યુટર છે.
પાકિસ્તાનથી આવેલા શરણાર્થીઓ પ્રથમ વખત મતદાન કરશે
રાજનાથ સિંહે વધુમાં કહ્યું કે, જમ્મુ-કાશ્મીરમાં દસ વર્ષ પછી વિધાનસભાની ચૂંટણી યોજાઈ રહી છે. સમગ્ર ભારત અને સમગ્ર વિશ્વની નજર અહીં યોજાનારી ચૂંટણી પર છે. જમ્મુ-કાશ્મીરમાં લોકો લાંબા સમયથી તેમના અધિકારોથી વંચિત હતા. આ વિધાનસભા ચૂંટણીમાં પાકિસ્તાનથી આવેલા શરણાર્થીઓ, આપણા વાલ્મિકી સમુદાય અને સફાઈ કામદારોના પરિવારોને પ્રથમ વખત સ્થાનિક સંસ્થાઓની ચૂંટણીમાં મતદાન કરવાનો અધિકાર મળ્યો છે.
વાલ્મિકી સમાજની વર્ષો જૂની માંગ પૂરી થઈ
કેન્દ્રીય રક્ષા મંત્રીએ કહ્યું કે, SC કેટેગરીના લાભ મેળવવાની વાલ્મિકી સમાજની વર્ષો જૂની માંગ પૂરી થઈ ગઈ છે. પ્રથમ વખત ST સમુદાય માટે વિધાનસભામાં બેઠકો અનામત રાખવામાં આવી છે. કાશ્મીર ઘાટીમાં આપણે જે પરિવર્તન જોઈ રહ્યા છીએ તે આજે આખી દુનિયા જોઈ રહી છે. ગયા વર્ષે જ્યારે ભારતમાં G-20નું આયોજન કરવામાં આવ્યું હતું, ત્યારે તેની એક બેઠકનું શ્રીનગરમાં પણ સફળતાપૂર્વક આયોજન કરવામાં આવ્યું હતું.
પાકિસ્તાન સરકાર PoKને વિદેશી જમીન માને છેઃ રાજનાથ સિંહ
રાજનાથ સિંહે વધુમાં કહ્યું કે, જમ્મુ અને કાશ્મીર જે પહેલા આખા દેશમાં આતંકવાદના સ્થળ તરીકે જાણીતું હતું તે હવે પર્યટનનું હોટસ્પોટ બની ગયું છે. સાડા ત્રણ દાયકા પછી પ્રથમ વખત શ્રીનગરમાં તાજિયા બહાર આવ્યા છે. પહેલા જમ્મુથી શ્રીનગર જવા માટે ઘણો સમય લાગતો હતો. પરંતુ હવે જમ્મુથી સાડા ચાર કલાકમાં શ્રીનગર પહોંચી શકાય છે. પાકિસ્તાન સરકાર PoKને વિદેશી જમીન માને છે. પાકિસ્તાનના ASGએ પોતે એક એફિડેવિટમાં આ વાત કહી છે. જ્યારે અમે PoKના લોકોને પોતાના ગણીએ છીએ.
પીઓકે ભારતનો ભાગ છે - રાજનાથ સિંહ
રાજનાથ સિંહે વધુમાં કહ્યું કે, ભાજપે તેના સંકલ્પ પત્રમાં કહ્યું છે કે જમ્મુ-કાશ્મીરમાં દરેક ઉજ્જવલા યોજનાના લાભાર્થીને વર્ષમાં બે સિલિન્ડર મફત આપવામાં આવશે. અંતરિયાળ વિસ્તારોમાં ઉચ્ચ માધ્યમિક વર્ગમાં અભ્યાસ કરતા બાળકોને ટેબલેટ કે લેપટોપ આપવામાં આવશે. અમે સંકલ્પ કર્યો છે કે, જમ્મુ અને શ્રીનગર બન્ને શહેરોને મેટ્રો રેલ કનેક્ટિવિટી પૂરી પાડવામાં આવશે. તાવી નદી પર સારો રિવર ફ્રન્ટ બનાવવામાં આવશે. રામબન અને બનિહાલના કેટલાક વિસ્તારોને પ્રવાસન સ્થળો તરીકે વિકસાવવામાં આવશે.
કાશ્મીરી પંડિતોના સુરક્ષિત વાપસી કરીશું
કેન્દ્રીય રક્ષા મંત્રીએ કહ્યું કે, ભાજપે સંકલ્પ કર્યો છે કે અમે કાશ્મીરી પંડિતોના સુરક્ષિત વાપસી અને પુનર્વસનને ઝડપી કરીશું. આવી જ રીતે અમે પશ્ચિમ પાકિસ્તાનના શરણાર્થીઓ, POJKના શરણાર્થીઓ, વાલ્મિકી અને ગોરખા સમુદાયના લોકોના પુનર્વસનને પણ ઝડપી કરીશું.
