J&K: ડોડામાં ભારતીય સેનાને મળી મોટી સફળતા, 3 આતંકી ઠાર

• ડોડા જિલ્લાના જંગલ વિસ્તારમાં સુરક્ષા દળોની કાર્યવાહી
  
• ઘર્ષણ સુરક્ષા દળોએ ત્રણ આતંકવાદીઓને ઠાર કર્યા
• 11 અને 12 જૂનના રોજ ડોડામાં આતંકીઓએ કર્યો હતો હુમલો 

જમ્મુ-કાશ્મીરના ડોડા જિલ્લાના જંગલ વિસ્તારમાં સુરક્ષા દળોએ ત્રણ આતંકવાદીઓને ઠાર કર્યા છે. આ પહેલા 11 અને 12 જૂનના રોજ ડોડામાં આતંકીઓએ હુમલો કર્યો હતો, ત્યારબાદ સેના, CRPF અને જમ્મુ-કાશ્મીર પોલીસ સર્ચ ઓપરેશન ચલાવી રહી હતી.

ડોડામાં આ મહિને આતંકીઓએ કર્યો હતો હુમલો 

11 જૂને ડોડામાં આતંકીઓએ આર્મી-પોલીસ ચોકી પર હુમલો કર્યો હતો, જેમાં 6 સુરક્ષાકર્મીઓ ઘાયલ થયા હતા. આ પછી આતંકવાદીઓએ 12 જાન્યુઆરીના રોજ ગંડોહના કોટા ટોપમાં એક પોલીસકર્મીને ઘાયલ કર્યો હતો. આ પછી, સુરક્ષા દળોએ તેમની આતંકવાદ વિરોધી કામગીરીને વધુ તીવ્ર બનાવી અને જિલ્લામાં ઘૂસણખોરી કરનારા અને સક્રિય રહેલા ચાર પાકિસ્તાની આતંકવાદીઓ પર દરેકને 5 લાખ રૂપિયાના રોકડ ઈનામની જાહેરાત કરી.

આતંકીઓના ગોળીબાર સામે જવાનોએ આપ્યો વળતો જવાબ

અધિકારીએ જણાવ્યું કે પોલીસે સુરક્ષા દળોની મદદથી બુધવારે સવારે સિનુ પંચાયત ગામમાં ઓપરેશન શરૂ કર્યું, પરંતુ એક માટીના મકાનમાં છુપાયેલા આતંકવાદીઓ તરફથી ભારે ગોળીબાર કરવામાં આવ્યો, જેના પછી સુરક્ષા દળોએ જવાબી કાર્યવાહી કરી.

જમ્મુ-કાશ્મીર ડિવિઝનના ડીજીપી વિજય કુમારે કહ્યું હતું કે પોલીસને બુધવારે સવારે સર્ચ ઓપરેશન દરમિયાન ત્રણ આતંકવાદીઓની હાજરીની માહિતી મળી હતી. તેમણે કહ્યું કે ગયા અઠવાડિયે ડોડા, રાજૌરી અને પુંછ વિસ્તારમાં થયેલા શ્રેણીબદ્ધ આતંકવાદી હુમલાઓ બાદ આતંકવાદીઓને ખતમ કરવા માટે ઓપરેશન તેજ કરવામાં આવ્યું છે.

અધિકારીએ કહ્યું કે સેનાના હેલિકોપ્ટર દ્વારા વિસ્તાર પર નજર રાખવામાં આવી રહી છે. આ દરમિયાન અધિકારીઓએ જણાવ્યું કે રાજૌરી જિલ્લાના ચિંગુસ વિસ્તારના પિંડ ગામમાંથી એક ચાઈનીઝ હેન્ડગ્રેનેડ મળી આવ્યો છે. તેમણે કહ્યું કે મંગળવારે સાંજે સુરક્ષા દળોની પેટ્રોલિંગ ટીમ દ્વારા ગ્રેનેડ મળી આવ્યો હતો. અધિકારીઓએ બુધવારે જણાવ્યું કે રિયાસી જિલ્લાના જંગલ વિસ્તારમાં સશસ્ત્ર લોકોની શંકાસ્પદ ગતિવિધિ બાદ સર્ચ ઓપરેશન ચાલી રહ્યું છે.