- હંગામા સાથે 18મી લોકસભાનું પ્રથમ સત્ર થયું શરૂ
- ભારતના બંધારણને કોઈ શક્તિ સ્પર્શી શકે નહીં: રાહુલ ગાંધી
- સાંસદ કલ્યાણ બેનર્જીએ પ્રોટેમ સ્પીકરના મુદ્દે ભાજપ સરકારને ઘેરી
આજથી એટલે કે 24મી જૂનથી 18મી લોકસભાનું પ્રથમ સત્ર હંગામા સાથે શરૂ થયું છે. સત્રની શરૂઆત પહેલા જ ઈન્ડિયા ગઠબંધનના સાંસદો હાથમાં બંધારણની કોપી લઈને વિરોધ કરવા બહાર આવ્યા હતા. વિપક્ષી સાંસદોએ પણ વડાપ્રધાન મોદી સામે હોબાળો મચાવ્યો હતો.
આ વિરોધ અંગે કોંગ્રેસ સાંસદ રાહુલ ગાંધીએ કહ્યું કે, વડાપ્રધાન નરેન્દ્ર મોદીજી અને અમિત શાહજી બંધારણ પર જે કરી રહ્યા છે તે અમને સ્વીકાર્ય નથી. તેઓ જે ઈચ્છે છે તે અમે થવા દઈશું નહીં, તેથી જ આજે શપથ લેતી વખતે અમે બંધારણની કોપી હાથમાં લીધી હતી.
'કોઈ શક્તિ ભારતના બંધારણને સ્પર્શી શકે નહીં'
રાહુલ ગાંધી અહીં અટક્યા ન હતા. તેમણે વધુમાં કહ્યું કે ભારતના બંધારણને કોઈ શક્તિ સ્પર્શી શકે નહીં. અમે આમાં કોઈ ફેરફાર થવા દઈશું નહીં. રાહુલ ગાંધી સિવાય કોંગ્રેસના તમામ સાંસદોએ ભાજપ સરકારનો વિરોધ કર્યો હતો.
મલ્લિકાર્જુન ખડગેએ પણ પીએમ મોદી પર કર્યા આકરા પ્રહારો
વિરોધ અંગે કોંગ્રેસના રાષ્ટ્રીય અધ્યક્ષ મલ્લિકાર્જુન ખડગેએ કહ્યું કે, "નરેન્દ્ર મોદીજીએ બંધારણ તોડવાનો પ્રયાસ કર્યો, તેથી જ આજે તમામ પક્ષોના નેતાઓ એકજૂટ થયા છે અને વિરોધ કરી રહ્યા છે. જ્યાં ગાંધીજીની પ્રતિમા હતી, તેને હટાવી દેવામાં આવી હતી. બાબા આંબેડકરની પ્રતિમા પણ હટાવી દેવામાં આવી હતી." તેઓ તમામ લોકતાંત્રિક ધોરણોને તોડી રહ્યા છે, તેથી આજે અમે બતાવવા માંગીએ છીએ કે મોદીજી, તમારે બંધારણ મુજબ આગળ વધવું જોઈએ.
ટીએમસી સાંસદે પ્રોટેમ સ્પીકરના મુદ્દે ભાજપ સરકારને ઘેરી
ત્યારે બીજી તરફ ટીએમસી સાંસદ કલ્યાણ બેનર્જીએ પણ પ્રોટેમ સ્પીકરના મુદ્દે ભાજપ સરકારને ઘેરી હતી. તેમણે કહ્યું, "અમે વિરોધ કરી રહ્યા છીએ કારણ કે બંધારણની જોગવાઈઓનું ઉલ્લંઘન કરવામાં આવ્યું છે. પ્રોટેમ સ્પીકરની જે રીતે નિમણૂક કરવામાં આવી છે તે બંધારણીય જોગવાઈઓનું સ્પષ્ટ ઉલ્લંઘન છે અને પૂર્વધારણાઓનું પણ સ્પષ્ટ ઉલ્લંઘન છે."
