મહારાષ્ટ્રના મહેકરમાં બે સમુદાયો વચ્ચે થયેલી અથડામણ બાદ વિસ્તારમાં તણાવનું વાતાવરણ છે, જ્યાં રવિવારે મહેકરમાં ભારે હોબાળો જોવા મળ્યો હતો. આ પછી સબ-ડિવિઝનલ ઓફિસર રવિન્દ્ર જોગીએ કર્ફ્યુનો આદેશ આપ્યો છે.
મહારાષ્ટ્રના બુલઢાણા જિલ્લાના મહેકર શહેરમાં રવિવારે બે સમુદાયો વચ્ચે અથડામણ થઈ હતી. આ દરમિયાન ભારે હંગામો થયો હતો. રાજ્યમાં 23 નવેમ્બરે યોજાયેલી વિધાનસભા ચૂંટણીના પરિણામો બાદ 24 નવેમ્બરે આ ઘટના પ્રકાશમાં આવી હતી, જ્યાં બે સમુદાયો વચ્ચેના અથડામણે ગંભીર સ્વરૂપ લીધું હતું. ટોળાએ છ કારને આગ ચાંપી દીધી હતી. જેના કારણે પોલીસે ભીડને વિખેરવા બળપ્રયોગ કરવો પડ્યો હતો.
રવિવારે રાત્રે મહેકરના માલી પેઠ વિસ્તાર અને અન્ય કેટલાક વિસ્તારોમાં વાહનોને આગ ચાંપી દેવામાં આવી હતી. આ દરમિયાન મારામારીના બનાવો પણ બન્યા હતા. બંને જૂથોએ એકબીજા પર પથ્થરમારો કર્યો હતો. આ પછી પોલીસે આ વિસ્તારોમાં સુરક્ષા વધારી દીધી છે અને કર્ફ્યુ લગાવી દેવામાં આવ્યો છે. મહેકર શહેરની તમામ સરહદો બંધ કરી દેવામાં આવી છે. પોલીસે આ કેસમાં અત્યાર સુધીમાં 23 આરોપીઓની ધરપકડ કરી છે. તેની પૂછપરછ કરવામાં આવી રહી છે અને અન્ય તોફાનીઓની પણ શોધ કરવામાં આવી રહી છે.
સોશિયલ મીડિયા પર વીડિયો વાયરલ
મહેકરમાં આ હંગામાને કારણે બજાર પણ બંધ છે. સબ ડિવિઝનલ ઓફિસર રવિન્દ્ર જોગીએ કર્ફ્યુનો આદેશ આપ્યો છે. આથી રવિવારે રાતથી સમગ્ર શહેરમાં કર્ફ્યુ લાદી દેવામાં આવ્યો છે. પોલીસે લોકોને અપીલ કરી છે કે તેઓ કોઈપણ પ્રકારની અફવા પર વિશ્વાસ ન કરે. આ હંગામા દરમિયાન લાગેલી આગનો વીડિયો સોશિયલ મીડિયા પર વાયરલ થયો છે.
અફવા ફેલાવનાર સામે કડક કાર્યવાહી
સોશિયલ મીડિયા પર વાયરલ થઈ રહેલા વીડિયોને કારણે શહેરમાં તણાવ વધી ગયો છે. જોકે, હવે પોલીસ સોશિયલ મીડિયા પર ચાંપતી નજર રાખી રહી છે. પોલીસ દ્વારા કહેવામાં આવ્યું છે કે સોશિયલ મીડિયા પર કોઈપણ પ્રકારની અફવા ફેલાવનારાઓ સામે કડક કાર્યવાહી કરવામાં આવશે. શિવસેના (UBT)ના નેતા સિદ્ધાર્થ ખરાત તાજેતરમાં યોજાયેલી વિધાનસભા ચૂંટણીમાં મહેકર બેઠક પરથી જીત્યા છે.
