દેશના કોઇ પણ રાજ્યમાં ચૂંટણી હોય.. બધે પ્રચાર તો અલગ અલગ રીતે જ થતા હોય છે. બિહાર વિધાનસભાની ચૂંટણી આવી રહી છે.બધા પોતપોતાની રીતે પ્રચાર કરતા જોવા મળી રહ્યા છે. તેમાં એવા વીડિયો પણ શેર થઇ રહ્યા છે જેમાં કોઇ ફિલ્મ અભિનેતા પ્રચાર કરી રહ્યા હોય. ત્યારે ફિલ્મ અભિનેતા મનોજ બાજપેયી સાથે પણ આવુ જ કંઇ થયું. જેનો વિરોધ કરવામાં આવી રહ્યો છે.
મનોજ બાજપેયીએ કર્યો વિરોધ
મનોજ બાજપેયીએ આવા ફેક નકલી વીડિયો જેમાં તેઓ પ્રચાર કરતા હોય તે વીડિયોને લઇને તેમણે વિરોધ કર્યો છે.મનોજ બાજપેયીએ સ્પષ્ટતા કરી છે કે તેમનો કોઈ રાજકીય પક્ષ સાથે કોઈ સંબંધ નથી. બાજપેયીએ દરેકને અપીલ કરી હતી કે "વ્યક્તિગત અધિકારો" ના મુદ્દાઓ ઉઠાવતી ભ્રામક સામગ્રી શેર ન કરો અથવા તેનો પ્રચાર ન કરો.
તેજસ્વી યાદવના સોશિયલ એકાઉન્ટ પરથી શેર કરવામાં આવ્યો હતો?
બિહાર વિધાનસભા ચૂંટણીમાં આરજેડીના મુખ્યમંત્રી ચહેરા તેજસ્વી યાદવ સોશિયલ મીડિયા પર ખૂબ સક્રિય છે. જોકે તેમનું ફક્ત એક જ સોશિયલ મીડિયા હેન્ડલ છે, ઘણા લોકોએ તેમના નામે નકલી એકાઉન્ટ બનાવ્યા છે. આવા જ એક નકલી એકાઉન્ટ પરથી એક વીડિયો પોસ્ટ કરવામાં આવ્યો હતો, જેમાં તેમની પાર્ટીને મત આપવાની અપીલ કરવામાં આવી હતી. મનોજ બાજપેયી આ અપીલ કરતા જોવા મળ્યા હતા. જોકે આ વીડિયો અસલી નહોતો. તેને એડિટ કરવામાં આવ્યો હતો. તેજસ્વીનું અસલી એકાઉન્ટ @yadavtejashwi છે.
સોશિયલ મીડિયામાં વીડિયો વાયરલ
ઉલ્લેખનીય છે કે બિહારમાં ચૂંટણીની મોસમ દરમિયાન, ઘણી પોસ્ટ્સ સામે આવી છે જેના પર વાંધો ઉઠાવવામાં આવ્યો છે. મનોજ બાજપેયી ઉપરાંત, ઘણા અન્ય કલાકારોના વીડિયો એડિટ કરીને સોશિયલ મીડિયા પર વાયરલ કરવામાં આવ્યા છે, જેના કારણે તેઓ આ મામલો કોર્ટમાં પણ લઈ ગયા છે.
મનોજ બાજપેયી શું કહે છે?
ચૂંટણીની મોસમ દરમિયાન અભિનેતા મનોજ બાજપેયીએ એક પોસ્ટમાં કહ્યું કે હું જાહેરમાં કહેવા માંગુ છું કે મારો કોઈ રાજકીય પક્ષ સાથે કોઈ જોડાણ નથી. સોશિયલ મીડિયા પર શેર કરવામાં આવી રહેલો વીડિયો પ્રાઇમ વિડીયોનો છે, જ્યાં હું કામ કરતો હતો. જોકે તે વીડિયો એડિટ કરીને વાયરલ કરવામાં આવ્યો છે. હું આ વીડિયોને શેર કરનારા તમામ લોકોને આવી સામગ્રી ફેલાવવાનું બંધ કરવા માટે નિષ્ઠાપૂર્વક અપીલ કરું છું.
જાહેર પ્રતિક્રિયાઓ
સોશિયલ મીડિયા વપરાશકર્તાઓએ પરિસ્થિતિ પર ઝડપથી પ્રતિક્રિયા આપી. એક યુઝરે લખ્યું, "આજના ડિજિટલ યુગમાં, ડીપફેક અને ભ્રામક એડિટિંગ દરેક જાહેર વ્યક્તિની પ્રતિષ્ઠા માટે ખતરો છે. પક્ષની નિષ્ઠા નક્કી કરવા માટે આવી ચાલાકીવાળી સામગ્રી પર આધાર રાખવાથી જાણકાર રાજકીય પ્રવચનનો પાયો જ નબળો પડે છે. આપણે આનાથી વધુ સારા બનવું પડશે."
