Surat નું ઉધના રેલ્વે સ્ટેશન બન્યું બિહાર વિધાનસભા ચૂંટણીનું રણમેદાન, વતન જતાં પરપ્રાંતીય મુસાફરોને જાગૃત કરાયા

બિહાર વિધાનસભાની ચૂંટણી નજીક આવતા જ તેનું કેમ્પેઈન હવે ગુજરાતના સુરત શહેર સુધી પહોંચી ગયું છે. સુરતના ઉધના રેલ્વે સ્ટેશન પર ભારતીય જનતા પાર્ટી (BJP) ના કાર્યકર્તાઓએ વતન બિહાર જઈ રહેલા મુસાફરો વચ્ચે પહોંચીને અનોખો પ્રચાર કર્યો. કાર્યકર્તાઓએ મુસાફરોને વડાપ્રધાન નરેન્દ્ર મોદીનો ફોટો લગાવેલી પાણીની બોટલો આપી હતી. આ બોટલો પર બિહારમાં ભાજપની સરકાર બનાવવા માટે મતદાન કરવાની અપીલ કરતો સંદેશ પણ લખેલો હતો.

બિહારમાં ગુજરાત મોડેલનું સપનું

ભાજપના કાર્યકર્તાઓએ મુસાફરોને ખાસ કરીને એ વાત પર ભાર મૂક્યો કે જો બિહારમાં ભાજપની સરકાર બનશે તો ત્યાં પણ ગુજરાત મોડેલ જેવો જ વિકાસ થશે. કાર્યકર્તાઓએ મુસાફરોને બિહારના ઉજ્જવળ ભવિષ્ય માટે ભાજપની સરકાર બનાવવાની વિનંતી કરી. સુરત, જે પરપ્રાંતીય લોકો માટે મોટું રોજગાર સ્થળ છે, ત્યાંથી મોટી સંખ્યામાં લોકો ચૂંટણીમાં મતદાન કરવા માટે નવેમ્બરમાં બિહાર જવા રવાના થઈ રહ્યા છે. આ પરપ્રાંતીય મતદારોને આકર્ષવાનો આ એક વ્યૂહાત્મક પ્રયાસ હતો.

મતદાન કરીને પરત ફરવા માટે પ્રોત્સાહન

ભાજપ દ્વારા આ કેમ્પેઈનનો મુખ્ય ઉદ્દેશ્ય એ છે કે જે પરપ્રાંતીય ભાઈઓ બિહાર જઈ રહ્યા છે તેઓ ત્યાં પોતાનો મતાધિકાર ચોક્કસપણે વાપરે અને મતદાન કરીને પરત ફરે. ઉલ્લેખનીય છે કે, નવેમ્બર મહિનામાં બિહારમાં ચૂંટણી થવા જઈ રહી છે અને તેથી જ ઉધના રેલ્વે સ્ટેશન પરથી વતન જનારા લોકોનો પ્રવાહ વધ્યો છે. ભાજપ આ મોટી સંખ્યાના પ્રવાસીઓને સીધી રીતે સંપર્ક કરીને તેમને પોતાના પક્ષમાં મતદાન કરવા માટે પ્રેરિત કરી રહ્યું છે.