દિવાળીના તહેવારની રજાઓ શરૂ થતાં જ સુરત શહેરમાંથી વતન તરફ જઈ રહેલા મુસાફરોની ભારે ભીડ જોવા મળી રહી છે. મુખ્યત્વે ઉત્તર પ્રદેશ (યુપી) અને બિહાર જેવા રાજ્યોના વતનીઓ કે જેઓ સુરતમાં કામકાજ માટે વસેલા છે, તેઓ દિવાળીની ઉજવણી કરવા માટે પોતાના વતન જવા નીકળ્યા છે. જેના કારણે સુરતના ઉધના રેલવે સ્ટેશન પર હજારોની સંખ્યામાં મુસાફરો ઉમટી પડ્યા છે. ટ્રેનોમાં જગ્યા મેળવવા માટે અને સ્ટેશન પરિસરમાં મુસાફરોનો અસાધારણ ધસારો જોવા મળી રહ્યો છે.
ભીડને નિયંત્રિત કરવા માટે વિશેષ વ્યવસ્થા
મુસાફરોની આ બેકાબૂ ભીડને નિયંત્રિત કરવા અને વ્યવસ્થા જાળવવા માટે રેલવે પ્રશાસન તેમજ સ્થાનિક પોલીસ દ્વારા વિશેષ પગલાં લેવામાં આવ્યા છે. રેલવે સ્ટેશનના પ્લેટફોર્મ તરફ જતાં રસ્તાઓ પર મુસાફરોની લાંબી લાઈનો લગાવવામાં આવી છે, જેથી વ્યવસ્થિત રીતે પ્રવેશ આપી શકાય. આ ઉપરાંત, સલામતી અને ભીડ વ્યવસ્થાપન માટે એક અનોખો પ્રયોગ કરવામાં આવ્યો છે. ઉધના રેલવે સ્ટેશનના સમગ્ર પરિસરનું ડ્રોન દ્વારા નિરીક્ષણ કરવામાં આવ્યું, જેથી ભીડની સ્થિતિનો ચોક્કસ ખ્યાલ મળી શકે અને વ્યવસ્થા જાળવી શકાય.
