વડાપ્રધાન નરેન્દ્ર મોદી રાષ્ટ્રપતિ ભવનમાં રાષ્ટ્રપતિ દ્રૌપદી મુર્મુને મળ્યા હતા અને દિવાળીની શુભેચ્છાઓ પાઠવી. રાષ્ટ્રપતિ મુર્મુએ સોશિયલ મીડિયા પોસ્ટમાં લખ્યું કે વડાપ્રધાન નરેન્દ્ર મોદી રાષ્ટ્રપતિ ભવનમાં રાષ્ટ્રપતિ દ્રૌપદી મુર્મુને મળ્યા અને દિવાળીની શુભેચ્છાઓ પાઠવી અગાઉ, રાષ્ટ્રપતિ દ્રૌપદી મુર્મુએ દેશવાસીઓને દિવાળીની શુભેચ્છાઓ પાઠવી હતી. ઇન્સ્ટાગ્રામ પર એક પોસ્ટ શેર કરતા રાષ્ટ્રપતિ મુર્મુએ લખ્યું હતું કે દિવાળીના શુભ અવસર પર, હું ભારત અને વિશ્વભરના તમામ ભારતીયોને મારી હૃદયપૂર્વકની શુભેચ્છાઓ અને શુભકામનાઓ પાઠવું છું.
તહેવાર આત્મનિરીક્ષણ અને આત્મ-સુધારણાનો પણ પ્રસંગ
રાષ્ટ્રપતિએ કહ્યું, "આનંદનો આ તહેવાર આત્મનિરીક્ષણ અને આત્મ-સુધારણાનો પણ પ્રસંગ છે. આ તહેવાર વંચિત અને જરૂરિયાતમંદોને મદદ અને ટેકો આપવા અને તેમના જીવનમાં ખુશીઓ લાવવાનો પણ એક અવસર છે. હું દરેકને સુરક્ષિત, જવાબદાર અને પર્યાવરણને અનુકૂળ રીતે દિવાળી ઉજવવા વિનંતી કરું છું. આ દિવાળી બધા માટે ખુશી, શાંતિ અને સમૃદ્ધિ લાવે."
પીએમ મોદીએ સૈનિકો સાથે દિવાળી ઉજવી
આ દરમિયાન, વડા પ્રધાન નરેન્દ્ર મોદીએ સોમવારે સૈનિકો સાથે દિવાળી ઉજવવાની પરંપરા ચાલુ રાખી, આ વર્ષે ગોવા અને કારવારના દરિયાકાંઠે INS વિક્રાંતની મુલાકાત લીધી. વડા પ્રધાન મોદીએ સૈનિકો સાથે વાતચીત કરી અને કહ્યું કે તેમને નૌકાદળના કર્મચારીઓ સાથે પ્રકાશના પર્વની ઉજવણી કરવાનો લહાવો મળ્યો. સૈનિકોને સંબોધતા તેમણે કહ્યું, "આજે, એક તરફ મારી પાસે અનંત ક્ષિતિજ, અનંત આકાશ છે, અને બીજી બાજુ આ ભવ્ય INS વિક્રાંત છે, જે અનંત શક્તિનું પ્રતીક છે. સમુદ્રના પાણી પર ચમકતા સૂર્યના કિરણો બહાદુર સૈનિકો દ્વારા પ્રગટાવવામાં આવેલા દિવાળીના દીવા જેવા છે."
દિવાળી એ પાંચ દિવસનો તહેવાર
દિવાળી એ પાંચ દિવસનો તહેવાર છે જે ધનતેરસથી શરૂ થાય છે. ધનતેરસ પર, લોકો ઘરેણાં અથવા વાસણો ખરીદે છે અને દેવતાઓની પૂજા કરે છે. બીજા દિવસને નરક ચતુર્દશી કહેવામાં આવે છે, જેને કાળી ચૌદશ પણ કહેવામાં આવે છે. દિવાળીનો ત્રીજો દિવસ ઉજવણીનો મુખ્ય દિવસ છે. આ દિવસે, લોકો ભગવાન ગણેશ અને દેવી લક્ષ્મીની પૂજા કરે છે, સંપત્તિ અને સમૃદ્ધિ માટે તેમના આશીર્વાદ માંગે છે. દિવાળીનો ચોથો દિવસ ગોવર્ધન પૂજાને સમર્પિત છે અને બેસતું વર્ષ પણ છે. ત્યાર બાદ બીજના દિવસને ભાઈબીજ કહેવામાં આવે છે. આ દિવસે, બહેનો તેમના ભાઈઓને તિલક લગાવે છે અને તેમના લાંબા અને સુખી જીવનની શુભેચ્છા પાઠવે છે, અને ભાઈઓ તેમની બહેનોને ભેટ આપે છે.
