સમાજવાદી પાર્ટીના દિગ્ગજ નેતા અને પૂર્વ સાંસદ આઝમ ખાન લાંબા સમય સુધી જેલમાં રહ્યા બાદ આખરે સીતાપુર જેલમાંથી મુક્ત થયા છે. તેમની મુક્તિ સમયે મોટી સંખ્યામાં સમાજવાદી પાર્ટીના કાર્યકરો અને નેતાઓ તેમને આવકારવા પહોંચ્યા હતા. શિવપાલ યાદવે તેમનું સ્વાગત કર્યું, ત્યારબાદ આઝમ ખાનનો કાફલો રામપુર જવા રવાના થયો. જોકે, રામપુર પહોંચતા જ આઝમ ખાન અને પોલીસકર્મીઓ વચ્ચે ઉગ્ર બોલાચાલી થઈ, જેનો વીડિયો પણ વાયરલ થયો છે. પોલીસ દ્વારા તેમના કાફલામાં સામેલ 73 ગાડીઓનું ચલણ કાપવામાં આવ્યું, જેના કારણે માહોલ તંગ બન્યો હતો.
આઝમ ખાન અને પોલીસ વચ્ચે ઘર્ષણ
રામપુર પહોંચતા આઝમ ખાનના કાફલામાં મોટી સંખ્યામાં વાહનો હોવાથી પોલીસે તેના પર વાંધો ઉઠાવ્યો હતો. આ વાતથી નારાજ થઈને આઝમ ખાન પોલીસ સાથે બોલાચાલી કરવા લાગ્યા. તેમણે દલીલ કરી કે, "આ લોકો સામાન્ય નાગરિકો છે અને તેઓ પોતાના રસ્તે જઈ રહ્યા છે. અમારે તેમની સાથે કોઈ લેવાદેવા નથી." આ બોલાચાલીનો વીડિયો પણ સામે આવ્યો છે, જેમાં આઝમ ખાન પોતાની ગાડીમાં બેઠા બેઠા પોલીસ સાથે દલીલો કરતા જોવા મળે છે. આ ઘટનાએ સ્પષ્ટ કરી દીધું છે કે, જેલમાંથી બહાર આવ્યા બાદ પણ આઝમ ખાનની મુશ્કેલીઓનો અંત આવ્યો નથી.
