J&Kમા આ વર્ષનું સૌથી મોટુ એન્ટી ટેરર ઓપરેશન, કુલગામમાં 3 દિવસથી ભયંકર એન્કાઉન્ટર , 3 આતંકી ઠાર

છેલ્લા ત્રણ દિવસથી જમ્મુ અને કાશ્મીરના કુલગામમાં ચાલી રહેલી સુરક્ષા દળો અને આતંકવાદીઓ વચ્ચેની અથડામણ આજે પણ યથાવત છે. ગઈકાલે અખલના જંગલોમાં આખી રાત વિસ્ફોટ અને ગોળીબાર ચાલુ રહ્યો. ભારતીય સેનાના સૂત્રોએ જણાવ્યું હતું કે આ આ વર્ષનું સૌથી મોટું ઓપરેશન હોઈ શકે છે. સુરક્ષા દળોએ અત્યાર સુધીમાં આ એન્કાઉન્ટરમાં ત્રણ આતંકવાદીઓને ઠાર કર્યા છે.

હાઇ-ટેક સર્વેલન્સ સિસ્ટમ અને સ્પેશિયલ પેરા ફોર્સના જવાનો આ આતંકવાદ વિરોધી કામગીરીમાં સામેલ છે.

હાઇ-ટેક સર્વેલન્સ સિસ્ટમ અને સ્પેશિયલ પેરા ફોર્સના જવાનો આ આતંકવાદ વિરોધી કામગીરીમાં સામેલ છે. જમ્મુ અને કાશ્મીરના ડીજીપી અને સેનાના 15મા કોર્પ્સના કમાન્ડર આ આતંકવાદ વિરોધી કામગીરી પર નજીકથી નજર રાખી રહ્યા છે. જમ્મુ અને કાશ્મીર પોલીસે એક નિવેદનમાં જણાવ્યું હતું કે સ્પેશિયલ ઓપરેશન ગ્રુપ (SOG), સેના અને સેન્ટ્રલ રિઝર્વ પોલીસ ફોર્સ (CRPF) ની સંયુક્ત ટીમ અખલના જંગલોમાં ચાલી રહેલા આ આતંકવાદ વિરોધી કામગીરીમાં રોકાયેલી છે.

એક પોલીસ અધિકારીએ જણાવ્યું હતું કે આતંકવાદીઓની હાજરીની ગુપ્ત માહિતી મળ્યા બાદ સુરક્ષા દળોએ 1 ઓગસ્ટના રોજ દક્ષિણ કાશ્મીરના અખાલ જંગલ વિસ્તારમાં કોર્ડન અને સર્ચ ઓપરેશન શરૂ કર્યું હતું. તેમણે કહ્યું કે છુપાયેલા આતંકવાદીઓએ સુરક્ષા દળો પર ગોળીબાર કર્યા બાદ સર્ચ ઓપરેશન એન્કાઉન્ટરમાં ફેરવાઈ ગયું, ત્યારબાદ સુરક્ષા દળોએ વળતો જવાબ આપ્યો.

જમ્મુ અને કાશ્મીરમાં એક અઠવાડિયામાં ત્રણ એન્કાઉન્ટર

આ અઠવાડિયામાં જમ્મુ અને કાશ્મીરમાં આતંકવાદીઓ સાથે સુરક્ષા દળોનું આ ત્રીજું એન્કાઉન્ટર છે. અગાઉ, સુરક્ષા દળોએ ઓપરેશન મહાદેવ હાથ ધર્યું હતું અને પહેલગામ હુમલામાં સામેલ ત્રણ આતંકવાદીઓને ઠાર માર્યા હતા - સુલેમાન, અફઘાન અને જિબ્રાન. લશ્કર-એ-તૈયબાનો ટોચનો કમાન્ડર સુલેમાન પહેલગામ અને ગગનગીર આતંકવાદી હુમલાનો માસ્ટરમાઇન્ડ હતો.

કેન્દ્રીય ગૃહ પ્રધાન અમિત શાહે 29 જુલાઈના રોજ સંસદમાં જણાવ્યું હતું કે આ ત્રણ પાકિસ્તાની આતંકવાદીઓ તરીકે ઓળખાઈ ગયા છે જેમણે 22 એપ્રિલના રોજ પહેલગામની બૈસરન ખીણમાં 26 નિર્દોષ પ્રવાસીઓને નિર્દયતાથી ગોળી મારીને હત્યા કરી હતી. 31 જુલાઈના રોજ પૂંછમાં નિયંત્રણ રેખા નજીક વધુ બે આતંકવાદીઓ માર્યા ગયા હતા. પોલીસે જણાવ્યું હતું કે બંને પાકિસ્તાનથી ઘૂસણખોરી કરીને ભારતીય સરહદમાં પ્રવેશ્યા હતા, અને નિયંત્રણ રેખા નજીક સુરક્ષા દળો દ્વારા તેમને ઠાર કરવામાં આવ્યા હતા. બીજી તરફ, ગુપ્ત માહિતી મળ્યા બાદ સુરક્ષા દળોએ 1 ઓગસ્ટના રોજ કુલગામના જંગલોમાં સર્ચ ઓપરેશન શરૂ કર્યું હતું, જે આતંકવાદીઓ દ્વારા ગોળીબાર કર્યા બાદ એન્કાઉન્ટરમાં ફેરવાઈ ગયું હતું.