જમ્મુ અને કાશ્મીરના ડીજીપી નલિન પ્રભાતે નૌગામ પોલીસ સ્ટેશનમાં થયેલા વિસ્ફોટને અકસ્માત ગણાવ્યો છે. તેમણે એક પત્રકાર પરિષદમાં જણાવ્યું હતું કે પોલીસ સ્ટેશનમાં થયેલો વિસ્ફોટ કોઈ આતંકવાદી કાવતરું કે હુમલો નહોતો, પરંતુ ફક્ત એક અકસ્માત હતો. આ બ્લાસ્ટ ત્યારે થયો જ્યારે એફએસએલની ટીમ નમૂના એકત્રિત કરી રહી હતી.
દુર્ભાગ્યપૂર્ણ અકસ્માત છે- ડીજીપી
તેમણે જણાવ્યું હતું કે ફરીદાબાદમાંથી જપ્ત કરાયેલા વિસ્ફોટકોના નમૂના લેવાની પ્રક્રિયા બે દિવસથી ચાલી રહી હતી અને આ ઘટના રાત્રે લગભગ 11.20 વાગ્યે બની હતી. ડીજીપી નલિન પ્રભાતે કહ્યું, આ એક દુર્ભાગ્યપૂર્ણ અકસ્માત છે. વિગતવાર તપાસ ચાલી રહી છે.
આતંકી કાવતરુ ન હતું- ડીજીપી
ડીજીપીએ સ્પષ્ટતા કરી હતી કે આ ઘટનામાં કોઈ આતંકવાદી કાવતરું કે બાહ્ય હસ્તક્ષેપ સામેલ નથી. અકસ્માતમાં નવ લોકો માર્યા ગયા અને ૩૨ ઘાયલ થયા. કાટમાળ દૂર કરવાનું કામ હાલમાં ચાલી રહ્યું છે, તેથી મૃત્યુઆંક અને ઘાયલોની સંખ્યા વધી શકે છે.
ગઇકાલે રાત્રે અચાનક થયો વિસ્ફોટ
ડીજીપી નલિન પ્રભાતે જણાવ્યું હતું કે ફરીદાબાદમાંથી જપ્ત કરાયેલા વિસ્ફોટક પદાર્થો અને રસાયણોનો મોટો જથ્થો તપાસ માટે નૌગામ પોલીસ સ્ટેશન લાવવામાં આવ્યો હતો. તેની સંવેદનશીલ પ્રકૃતિને ધ્યાનમાં રાખીને, પ્રક્રિયા કાળજીપૂર્વક હાથ ધરવામાં આવી રહી હતી, પરંતુ ગઈકાલે રાત્રે આકસ્મિક વિસ્ફોટ થયો.
9 લોકોના થયા હતા મોત
ઉલ્લેખનીય છે કે જમ્મુ અને કાશ્મીરના શ્રીનગરમાં નૌગામ પોલીસ સ્ટેશન પાસે દિલ્હી શૈલીના વિસ્ફોટમાં નવ લોકો માર્યા ગયા હતા. ત્રીસ લોકો ગંભીર રીતે ઘાયલ થયા હતા, અને અનેક વાહનો નાશ પામ્યા હતા. પોલીસ સ્ટેશનની ઇમારતનો એક ભાગ પણ નાશ પામ્યો હતો. વિસ્ફોટ એટલો શક્તિશાળી હતો કે શરીરના ભાગો ટુકડા થઈ ગયા હતા, અને શરીરના ભાગો 300 ફૂટ દૂર સુધી વિખેરાઈ ગયા હતા. વિસ્ફોટથી આગ લાગી, ઉંચી જ્વાળાઓ ફેલાઈ ગઈ અને આકાશ કાળા ધુમાડાથી ભરાઈ ગયું.
