Jyoti Malhotraનું પાકિસ્તાન કનેક્શન બેનકાબ, 2500 પાનાની ચાર્જશીટ દાખલ, જાણો શું થયા ખુલાસા

પાકિસ્તાન માટે જાસૂસી કરવાના આરોપસર ધરપકડ કરાયેલા યુટ્યુબર જ્યોતિ મલ્હોત્રા વિરુદ્ધ ચાર્જશીટ દાખલ કરવામાં આવી છે. હિસાર પોલીસે કોર્ટમાં 2500 પાનાની આ ચાર્જશીટ દાખલ કરી છે. સૂત્રોના જણાવ્યા અનુસાર, જ્યોતિનું પાકિસ્તાન કનેક્શન ખુલ્યું છે. હરિયાણા પોલીસ સૂત્રોના જણાવ્યા અનુસાર, સ્પેશિયલ ઇન્વેસ્ટિગેશન ટીમ (SIT) દ્વારા દાખલ કરાયેલ ચાર્જશીટમાં, પોલીસનો દાવો છે કે જ્યોતિ પાકિસ્તાન માટે ટૂલકીટ તરીકે ઉપયોગમાં આવી રહી હતી. 

ફોનમાંથી મળી મહત્વની માહિતી 

પોલીસનો દાવો છે કે જ્યોતિ મલ્હોત્રા પાકિસ્તાની એજન્ટો સાથે માહિતી શેર કરતી હતી અને સતત તેમના સંપર્કમાં રહેતી હતી. જ્યોતિ તેના પાકિસ્તાન પ્રવાસ દરમિયાન ત્યાંના એજન્ટોના સંપર્કમાં આવી હતી. પોલીસને જ્યોતિના મોબાઇલ ફોનમાંથી ઘણી મહત્વપૂર્ણ માહિતી મળી છે.

પોલીસને મળી એક ચેટ 

યુટ્યુબર જ્યોતિ મલ્હોત્રા પાકિસ્તાન હાઇ કમિશનમાં તૈનાત દાનિશ અલી સાથે સતત સંપર્કમાં હતી. પોલીસને જ્યોતિ અને દાનિશ વચ્ચે ચેટ પણ મળી છે. જ્યોતિ ISI એજન્ટો શાકિર, હસન અલી અને નાસિર ઢિલ્લોન સાથે વાત કરતી હતી. જ્યોતિ અને હસન નામના એજન્ટ વચ્ચે ચેટ પણ પોલીસને મળી છે.

કેસ ડાયરીમાં જ્યોતિના તમામ વિદેશ પ્રવાસોનો ઉલ્લેખ

આ સાથે કેસ ડાયરીમાં જ્યોતિના તમામ વિદેશ પ્રવાસોનો પણ ઉલ્લેખ કરવામાં આવ્યો છે. જ્યોતિ મલ્હોત્રા 'ટ્રાવેલ વિથ જિયો' નામની યુટ્યુબ ચેનલ ચલાવતી હતી. મહત્વનું છે જ્યોતિને પોલીસે 16 મે 2025 ના રોજ ધરપકડ કરી હતી અને ત્યારથી તે ન્યાયિક કસ્ટડીમાં છે. આ કેસમાં હરિયાણા પોલીસે ઘણા સોશિયલ મીડિયા પ્રભાવકોને સમન્સ પણ પાઠવ્યા હતા અને તેમની પૂછપરછ કરી હતી.

પાકિસ્તાન હાઈ કમિશનમાં તૈનાત એહસાન-ઉર-રહીમ ઉર્ફે દાનિશને 13 મેના રોજ જાસૂસીમાં સામેલ હોવાના આરોપસર હાંકી કાઢવામાં આવ્યો હતો. જ્યોતિ મલ્હોત્રા વિરુદ્ધ ઓફિશિયલ સિક્રેટ્સ એક્ટ અને ભારતીય દંડ સંહિતાની કલમો હેઠળ કેસ નોંધવામાં આવ્યો છે.