Maharashtra માં ભાષાનો વિવાદ વકર્યો, મરાઠી ન બોલવા બદલ ઓટો ડ્રાઈવરને જાહેરમાં માર માર્યો

મહારાષ્ટ્રમાં ભાષાને લઈને ચાલી રહેલો વિવાદ હવે વધુ ઘેરો બન્યો છે. મરાઠી ન બોલવા બદલ અન્ય રાજ્યોના લોકોની મારપીટની ઘટનાઓ પર ભારે હોબાળો મચી રહ્યો છે. મુખ્યમંત્રી દેવેન્દ્ર ફડણવીસે પણ આ મામલે મારપીટ કરનારા લોકોને કડક ચેતવણી આપી હતી, પરંતુ તેમ છતાં, મુંબઈ નજીક આવેલા પાલઘરના વિરારમાં મનસે અને શિવસેના (UBT)ના કાર્યકરોએ એક રિક્ષાચાલકને જાહેરમાં માર માર્યો છે, જેનો વીડિયો પણ વાયરલ થઈ રહ્યો છે.

"હું હિન્દી બોલીશ, ભોજપુરી બોલીશ, પણ મને મરાઠી નથી આવડતી"

ઉત્તર ભારતીય ઓટો ડ્રાઈવરનો એક વીડિયો વાયરલ થયો હતો, જેમાં તે સ્પષ્ટપણે કહી રહ્યો છે કે, "હું હિન્દી બોલીશ, ભોજપુરી બોલીશ, પણ મને મરાઠી નથી આવડતી, હું નહીં બોલું." ડ્રાઈવરનો આ વીડિયો વાયરલ થયા બાદ લોકો ભડકી ઉઠ્યા હતા અને શિવસેના-મનસેના કાર્યકરોએ તેની શોધખોળ શરૂ કરી દીધી હતી. તેને પકડ્યા બાદ તેની નિર્દયતાથી મારપીટ કરવામાં આવી.

જાહેરમાં મારપીટ અને અપમાન

જાણવા મળ્યા મુજબ, ઓટો ડ્રાઈવરને પકડ્યા બાદ શિવસેના અને મનસેના કાર્યકરો તેને તે જ જગ્યાએ લઈ ગયા, જ્યાં તેણે મરાઠી ન બોલવાની વાત કહી હતી. તમામ લોકોની હાજરીમાં, અનેક કેમેરાની સામે શિવસેના અને મનસેના કાર્યકરોએ ઓટો ડ્રાઈવરને માર માર્યો. ઓટો ડ્રાઈવરની મારપીટનો વીડિયો પણ સોશિયલ મીડિયા પર ઝડપથી વાયરલ થઈ રહ્યો છે. મારપીટ કરવા ઉપરાંત, ઓટો ડ્રાઈવરને કાન પકડવા અને માફી માંગવા માટે મજબૂર કરવામાં આવ્યો. કાર્યકરોએ ઓટો ડ્રાઈવરને મરાઠીમાં માફી માંગવા માટે દબાણ કર્યું અને તેના માટે તેને માર પણ માર્યો. અંતે તેને એક મહિલાના પગ પકડીને માફી માંગવા માટે કહેવામાં આવ્યું, અને વાયરલ વીડિયોમાં ઓટો ડ્રાઈવર આમ કરતો પણ દેખાઈ રહ્યો છે.

પોલીસની ભૂમિકા પર સવાલ

આ વીડિયો વાયરલ થયા બાદ ગંભીર સવાલો ઉઠી રહ્યા છે કે, આટલી મોટી સંખ્યામાં લોકો જાહેરમાં એક વ્યક્તિને માર મારી રહ્યા છે, તેમ છતાં પોલીસને તેની જાણકારી જ કેમ નથી? રિપોર્ટ્સ અનુસાર, પોલીસના ધ્યાનમાં આ મામલો છે, પરંતુ તે ફરિયાદની રાહ જોઈ રહી છે. પોલીસનું કહેવું છે કે, જો કોઈ ફરિયાદ મળશે તો તે મુજબ કાર્યવાહી કરવામાં આવશે. આ ઘટના મહારાષ્ટ્રમાં પ્રાદેશિક ભાષાના નામે થતી દાદાગીરી અને કાયદો-વ્યવસ્થાની સ્થિતિ પર ગંભીર પ્રશ્નાર્થ ઊભા કરે છે. તંત્ર દ્વારા આવા અરાજક તત્વો સામે કડકમાં કડક કાર્યવાહી કરવાની તાતી જરૂરિયાત છે, જેથી ભવિષ્યમાં આવી ઘટનાઓનું પુનરાવર્તન ન થાય.