Delhiમાં ભારે વરસાદને કારણે અનેક વિસ્તારો પાણીમાં જળમગ્ન, હવામાન વિભાગે આપ્યુ રેડ એલર્ટ

રાજધાની દિલ્હી અને તેની આસપાસના વિસ્તારોમાં વહેલી સવારથી જ વરસાદ શરૂ થયો છે. આકાશમાં કાળા ડિબાંગ વાદળો છવાયેલા જોવા મળી રહ્યા છે. ઘણા વિસ્તારોમાં વહેલી સવારથી જ અવિરત પણે વરસાદ વરસી રહ્યો છે. તો દિલ્હી એનસીઆરમાં આજે ભારે વરસાદનુ રેડ એલર્ટ પણ જાહેર કરવામાં આવ્યુ છે. IMD પ્રમાણે ઉત્તરી દિલ્હી સિવાય આખા દિલ્હીમાં ભારે વરસાદનુ રેડ એલર્ટ આપવામાં આવ્યુ છે.

વરસાદને કારણે અનેક વિસ્તારો પાણીમાં જળમગ્ન

મળતી માહિતી પ્રમાણે IMDએ ઉત્તરી દિલ્હી સિવાય આખા દિલ્હીમાં ભારે વરસાદને લઇને રેડ એલર્ટ જાહેર કર્યુ છે. દિલ્હી સિવાય નોઇડા-ગાઝિયાબાદમાં પણ ભારે વરસાદનુ એલર્ટ છે. ગુરૂગ્રામમાં પણ વહેલી સવારથી જ મૂશળધાર વરસાદ થઇ રહ્યો છે. ભારે વરસાદને કારણે દિલ્હીના અનેક વિસ્તારો પાણીમા ડૂબેલા જોવા મળ્યા. સવારથી પડી રહેલા વરસાદને કારણે લોકોને ભારે હાલાકીનો સામનો કરવાનો વારો આવ્યો છે. આ સિવાય વહેલી સવારે ઓફિસે જતા લોકોને પણ પરેશાની ભોગવવી પડી હતી.

કેટલીક જગ્યાએ મધ્યમથી ભારે વરસાદની આગાહી

દિલ્હી સિવાય નોઈડા-ગાઝિયાબાદમાં પણ કંઇક આવા જ હાલ છે. ગુરુગ્રામમાં પણ સવારે 5:00 વાગ્યાથી ધોધમાર વરસાદ થઈ રહ્યો છે. એટલો વરસાદ થયો છે કે સાઇબર સિટીનાં અનેત વિસ્તારો પાણીમાં ડૂબી ગયા છે. ગુરુગ્રામના સેક્ટર 10 અને સેક્ટર 9 વિસ્તારોમાં ધોધમાર વરસાદ બાદ ભારે પાણી ભરાવ જોવા મળ્યો છે. હવામાન વિભાગે સવારે 6 વાગ્યા આસપાસ આવતા 2-3 કલાક દરમિયાન દિલ્હી અને એનસીઆરમાં મોટાભાગના વિસ્તારોમાં હળવોથી મધ્યમ વરસાદ અને કેટલીક જગ્યાએ મધ્યમથી ભારે વરસાદની શક્યતા વ્યક્ત કરી છે.