24 જાન્યુઆરી 2024ના રોજ રામલલ્લાની સ્થાપના કરવામાં આવી. આ દિવસે વડાપ્રધાન નરેન્દ્ર મોદીના હસ્તે ગર્ભગૃહમાં પ્રભુ શ્રી રામના બાળ સ્વરૂપ (રામલલ્લા)ની પ્રાણ-પ્રતિષ્ઠા કરવામાં આવી હતી。આ સાથે 500 વર્ષોની લાંબી રાહ અને ઐતિહાસિક આંદોલનનો સુખદ અંત આવ્યો હતો. દેશના ખૂણે ખૂણેથી ભગવાન રામ માટે લોકોએ દાન આપ્યુ હતું. ત્યારે આ દાનમાં કોઇ ઉચાપત થઇ હોવાના આરોપ સર હાલમાં એસઆઇટી તપાસ ચાલી રહી છે.
દાન ચોરીના આરોપ મામલે તપાસ તેજ
દાન ચોરી કેસમાં મંદિર ટ્રસ્ટે સીએમ યોગીને એસઆઇટી તપાસની માગ કરી હતી. જે અંતર્ગત SIT તપાસ ચાલુ છે. ટીમે જનરલ સેક્રેટરી ચંપત રાય અને પ્રશાસક ગોપાલ રાવ સહિત અનેક સ્ટાફ સભ્યોની પૂછપરછ કરી. તેમણે દાન પેટીઓથી લઈને રેકોર્ડ સુધીની દરેક વસ્તુની તપાસ કરી. SIT તપાસ આજે ત્રીજા દિવસે પણ ચાલુ છે.આ પ્રક્રિયા દરમિયાન દાનની રકમના સંગ્રહ, સુરક્ષા વ્યવસ્થા, ગણતરી પ્રક્રિયા અને આ કાર્યો માટે જવાબદાર વ્યક્તિઓ અંગે વિગતવાર માહિતી એકત્રિત કરવામાં આવી હતી.
તપાસનો આજે ત્રીજો દિવસ
લખનૌના વિભાગીય કમિશનર વિજય વિશ્વાસ પંત, જે SITનું નેતૃત્વ કરી રહ્યા છે, તેમણે લખનૌના IG કિરણ એસ. અને નાણાં વિભાગના વિશેષ સચિવ નીલરતન કુમાર સાથે વિવિધ સ્તરે પૂછપરછ કરી હતી. તપાસની ગુપ્તતા જાળવવા માટે, સુરક્ષા એજન્સીઓ સાથે સંકળાયેલા અધિકારીઓને પ્રક્રિયાથી દૂર રાખવામાં આવ્યા હતા. આજ, ત્રીજા દિવસે, તપાસ ટીમ અનેક પાસાઓની તપાસ કરશે અને સંબંધિત વ્યક્તિઓની પૂછપરછ કરશે.
દાન પેટીઓથી લઈને રેકોર્ડ સુધીની દરેક વસ્તુની તપાસ
તપાસ ટીમે મંદિર પરિસરમાં સ્થાપિત દાન પેટીઓનું નિરીક્ષણ કર્યું, તેમના નંબર અને સુરક્ષા વ્યવસ્થાની સમીક્ષા કરી અને રોકડ ગણતરી સંબંધિત તમામ રેકોર્ડ કબજે કર્યા. ટીમે સીસીટીવી ફૂટેજ, ડ્યુટી રજિસ્ટર, રોકડ જમા કરવાની પ્રક્રિયા અને સંબંધિત દસ્તાવેજોની પણ સંપૂર્ણ તપાસ કરી. સૂત્રોના જણાવ્યા અનુસાર, SIT દાન પેટીઓમાંથી કાઢવામાં આવેલા ભંડોળના તબક્કાઓ અને દેખરેખમાં સામેલ વ્યક્તિઓ તેમજ કથિત અનિયમિતતા કયા તબક્કે થઈ હશે તે સમજવાનો પ્રયાસ કરી રહી છે.
રામલલ્લાને મળેલા દાગીનાની ભેટનું પણ નિરીક્ષણ
SITના વડા વિજય વિશ્વાસ પંતે રામ લલ્લા ગર્ભગૃહની સામે સ્થિત ખાસ રૂમનું પણ નિરીક્ષણ કર્યું, જ્યાં ભક્તો દ્વારા દાન કરાયેલા દાગીના અને અન્ય કિંમતી ધાતુઓને સુરક્ષિત રીતે રાખવામાં આવે છે. આ રૂમ માટે જવાબદાર કર્મચારી તિવારી સાથે પણ વિગતવાર પૂછપરછ કરવામાં આવી. તપાસ ટીમે સુરક્ષા વ્યવસ્થા, રેકોર્ડ-કીપિંગ અને કિંમતી વસ્તુઓની સુરક્ષા માટેની પ્રક્રિયાઓ અંગે માહિતી એકત્રિત કરી.
મંગળવારે SITએ કોની કોની પૂછપરછ કરી ?
SIT મંગળવારે સવારે 10:30 વાગ્યાની આસપાસ મંદિર સંકુલમાં પહોંચી અને પરિમિતિ દિવાલની બહાર સ્થિત 'ગ્રીન હાઉસ'ની અંદર પૂછપરછ શરૂ કરી. શરૂઆતમાં મહાસચિવ ચંપત રાયને રોકડ ગણતરીમાં સામેલ સ્ટાફની નિમણૂક, દેખરેખ પદ્ધતિઓ અને જવાબદારીઓની સોંપણી અંગે પૂછપરછ કરવામાં આવી હતી.
પ્રશાસક ગોપાલ રાવને મંદિરની આંતરિક કામગીરી અને ભંડોળના સંચાલન વિશે પૂછપરછ કરવામાં આવી હતી. સૂત્રોના જણાવ્યા અનુસાર, SIT એ નક્કી કરવાનો પ્રયાસ કરી રહી છે કે દાન પેટીઓમાંથી રોકડ મેળવવાથી લઈને બેંકમાં જમા કરાવવા સુધીની સમગ્ર પ્રક્રિયામાં જવાબદારી ક્યાં છે અને દેખરેખ પ્રણાલી કેટલી અસરકારક હતી.
રોકડની ગણતરી માટે 40 કર્મચારીઓ
વળી દાન મેટીઓમાંથી એકત્રિત કરવામાં આવેલી રોકડની ગણતરી કરવામાં સામેલ 40 કર્મચારીઓની પણ પૂછપરછ કરવામાં આવી. જે એક કલેક્શન એજન્સીના કર્મચારીઓ છે. આ ઉપરાંત સ્ટેટ બેંક ઓફ ઇન્ડિયાના પણ કર્મચારીઓની તપાસ કરી. આ તમામ બે શિફ્ટમાં કામ કરે છે. તપાસ એજન્સીનું કામ રોકડને પિલગ્રીમ ફેસિલિટેશન સેન્ટર સ્થિત સુરક્ષિત રૂમ સુધી લઇ જવા પુરતી જ છે.
આ પણ વાંચો-પાણીપુરીમાં બટાકા ચણા જ કેમ ભરવામાં આવે છે?
