રામ મંદિર દાનપેટી વિવાદને લઇને એસઆઇટી દ્વારા તપાસ તેજ કરવામાં આવી રહી છે. એસઆઇટી દ્વારા દાનને લઇને સંકળાયેલા તમામ વ્યક્તિઓની પૂછપરછ કરવામાં આવી. સોનાની ભેટ હોય કે પછી રોકડ. તમામની સાથે સંકળાયેલા લોકોની તપાસ બાદ એક મોટો નિર્ણય લેવાયો છે. રામ મંદિરમાં પ્રસાદની ગણતરીમાં સામેલ લગભગ 40 કર્મચારીઓને કાર્યમાંથી દૂર કરવામાં આવ્યા છે.
SIT આજે સુપરત કરી શકે તપાસ
બેંક અને ટ્રસ્ટે આ કામ માટે નવા કર્મચારીઓને તૈનાત કર્યા છે. પ્રસાદ તરીકે પ્રાપ્ત થયેલા ભંડોળ અને દાગીનાની ગણતરી માટે દેખરેખ પદ્ધતિઓ પણ સુધારવામાં આવી છે. છ દિવસની તપાસ બાદ લખનૌ પરત ફરેલી SIT ટીમ આજે મુખ્યમંત્રી યોગી આદિત્યનાથને તેનો પ્રારંભિક અહેવાલ સુપરત કરે તેવી અપેક્ષા છે, જેનાથી આ મામલે આગળની કાર્યવાહીનો માર્ગ મોકળો થશે.
100થી વધુ લોકોની કરવામાં આવી પૂછપરછ
ઉત્તર પ્રદેશ સરકાર દ્વારા રચાયેલી ત્રણ સભ્યોની સ્પેશિયલ ઇન્વેસ્ટિગેશન ટીમ (SIT) એ દાન રેકોર્ડ, CCTV ફૂટેજ, રોકડ ગણતરી પ્રક્રિયાઓ અને દાગીના અને અન્ય કિંમતી વસ્તુઓ અંગેના દાવાઓની તપાસ કરી. ટ્રસ્ટના સભ્યો, પૂજારીઓ, બેંક અધિકારીઓ અને રોકડ સંભાળતા કર્મચારીઓ સહિત 100 થી વધુ વ્યક્તિઓની પૂછપરછ કરવામાં આવી હતી.
શહેર ન છોડવાની સૂચના
SIT એ તપાસ હેઠળ રહેલા લોકોને તપાસ પૂર્ણ ન થાય ત્યાં સુધી અયોધ્યા ન છોડવાનો નિર્દેશ આપ્યો છે. ટ્રસ્ટના એક અધિકારીએ જણાવ્યું SIT દ્વારા પહેલાથી જ જેમની પૂછપરછ કરવામાં આવી છે તેમને આગામી આદેશ સુધી શહેર ન છોડવાની સૂચના આપવામાં આવી છે. સૂત્રોના જણાવ્યા અનુસાર ટ્રસ્ટના અધિકારીઓ અને અન્ય લોકોની પૂછપરછ સહિત દૈનિક તપાસ કાર્યવાહીનો ડિજિટલ રેકોર્ડ જાળવવામાં આવ્યો છે. SITની તપાસ માત્ર દાનના દુરુપયોગને લઇને જ ન હતી પરંતુ મંદિર નિર્માણ માટે જે સામગ્રી ખરીદવામા આવી હતી તે તમામ રેકોર્ડસ અંગે પણ તપાસ કરી હતી.
ટીનુની સઘન તપાસ
SIT એ રામશંકર યાદવ ઉર્ફે ટીનુની સઘન પૂછપરછ કરી હતી. તેઓ રામ જન્મભૂમિ તીર્થ ક્ષેત્ર ટ્રસ્ટના મહાસચિવ ચંપત રાયના લાંબા સમયથી સહયોગી તરીકે જાણીતા છે. આ કેસથી પરિચિત સૂત્રોએ સંકેત આપ્યો કે ટીમે તેમના નજીકના સહયોગીઓ, સંબંધીઓ અને સંપત્તિઓ વિશે પણ માહિતી એકત્રિત કરી હતી.
સૂત્રોના જણાવ્યા અનુસાર ગેરરીતિનો એક મોટો કિસ્સો 2025ની શરૂઆતમાં પ્રયાગરાજ મહાકુંભ મેળા દરમિયાન બન્યો હતો. જ્યારે મંદિરમાં બે મહિના સુધી લગભગ 10 લાખ (દસ લાખ) ભક્તોનો દૈનિક ધસારો જોવા મળતો હતો, અને દાનપેટીઓ ફક્ત બે કલાકમાં ચલણી નોટોથી ભરાઈ જતી હતી.
140 પાનાનો તૈયાર કર્યો છે અહેવાલ
સંકેતો સૂચવે છે કે અયોધ્યા રામ મંદિરમાં પ્રસાદના વિવાદ અંગે મોટી કાર્યવાહી નિકટવર્તી છે. સૂત્રોના જણાવ્યા અનુસાર, વિશેષ તપાસ ટીમ (SIT) એ 140 પાનાનો અહેવાલ તૈયાર કર્યો છે, જેના આધારે ઘણા મંદિરના સેવકો પર શિસ્તભંગની કાર્યવાહી થઈ શકે છે. ટ્રસ્ટના સચિવની પહેલાથી જ ત્રણ કલાક બંધ બારણે પૂછપરછ થઈ ચૂકી છે. હવે બધાની નજર તેના પર છે કે શું કાર્યવાહી ફક્ત કર્મચારીઓ સુધી મર્યાદિત રહેશે કે ટ્રસ્ટમાં વરિષ્ઠ વ્યક્તિઓની ભૂમિકા અંગે પણ નિર્ણય લેવામાં આવશે.
