Narendra Modiના વોકલ ફોર લોકલના નારાને મજબૂત કરતા દેશનું પ્રથમ 'ખાદી ઇન્ડિયા-SBI RuPay ગિફ્ટ કાર્ડ લોન્ચ થયું

ખાદી અને ગ્રામોદ્યોગ આયોગે 'ખાદી દિવાળી ઉત્સવ'ને હમેશા માટે યાદગાર બનાવતા દેશનું પ્રથમ 'ખાદી ઇન્ડિયા-SBI RuPay પ્રીપેડ ગિફ્ટ કાર્ડ' લોન્ચ કર્યું છે.

ખાદી ઇન્ડિયા-SBI RuPay પ્રીપેડ ગિફ્ટ કાર્ડ

'ખાદી દિવાળી ઉત્સવ' ખાતે લોન્ચ કરવામાં આવેલ દેશનું પ્રથમ RuPay પ્રીપેડ ગિફ્ટ કાર્ડ આવનારા સમયમાં પીએમ મોદીના 'ડિજિટલ ઇન્ડિયા' અને 'વોકલ ફોર લોકલ'ના નારાને વધારે વેગીલો બનાવીને નાના મોટા સ્વદેશી વ્યાપાર કરનારા વેપારીઓ માટે આશીર્વાદ રૂપ સાબિત થઈ શકે એવી આશા બંધાઈ છે અને આ પહેલ સ્વદેશી વ્યાપારને વધારે પ્રોત્સાહન આપશે હાલ એવી આશા રાખવામાં આવી રહી છે.

ડિજિટલ રીતે ખાદી ખરીદીનો આધુનિક વિકલ્પ

ખાદી અને ગ્રામોદ્યોગ આયોગ દ્વારા શુક્રવારના રોજ વ્યાપરીઓ અને ખરીદદારો માટે દિલ્હીના પીથમપુર સ્થિત દિલ્હી હાટ ખાતે 'ખાદી દિવાળી' ઉત્સવની શરૂઆત કરવામાં આવી હતી. 'ડિજિટલ ઇન્ડિયા' અભિયાનને નવી દિશા આપવા માટે આ અભિયાનમાં સૌથી મોટી જાહેર ક્ષેત્રની બેંક, સ્ટેટ બેંક ઓફ ઇન્ડિયા સાથે સહભાગી બનીને સ્વદેશી 'ખાદી ઇન્ડિયા-SBI RuPay પ્રીપેડ ગિફ્ટ કાર્ડ' લોન્ચ કરવામાં આવ્યું હતું જે આવનારા સમયમાં પરંપરાગત કાગળના કૂપનને બદલે ડિજિટલ રીતે ખાદી ખરીદીનો આધુનિક વિકલ્પ બનશે.

ખાદી ઇન્ડિયા-SBI RuPay પ્રીપેડ ગિફ્ટ કાર્ડ કેવી રીતે કાર્ય કરશે?

આ ખાદી ઇન્ડિયા-SBI RuPay પ્રીપેડ ગિફ્ટ કાર્ડના ઉપયોગ વિશે માહિતી આપતા ખાદી અને ગ્રામોદ્યોગ આયોગના ચેરમેન તરફથી જણાવવામાં આવ્યું કે ખાદી ઇન્ડિયા-SBI RuPay પ્રીપેડ ગિફ્ટ કાર્ડ હવે ડિજિટલ રીતે એક ડેબિટ કાર્ડની જેમ કાર્ય કરે છે. આ કાર્ડમાં અગાઉથી એક રકમ પ્રી-લોડ કરીને રાખવામાં આવે છે જેનો ઉપયોગ ફક્ત ખાદીની ખરીદી માટે જ થઈ શકે છે અને સૌથી ખાસ વાત આ રકમ ઉપાડી શકાતી નથી.