ઉત્તર પ્રદેશમાં એક મહત્ત્વાકાંક્ષી ઈન્ફ્રાસ્ટ્રક્ચર પ્રોજેક્ટ તરીકે ગંગા એક્સપ્રેસવેનું 29 એપ્રિલે ઉદ્ઘાટન થવાનું છે. વડાપ્રધાન નરેન્દ્ર મોદી હરદોઈ જિલ્લાના મલ્લાવાંથી આ એક્સપ્રેસવેનું લોકાર્પણ કરશે. આશરે 594 કિલોમીટર લાંબો આ એક્સપ્રેસવે રાજ્યનો સૌથી લાંબો માર્ગ ગણાઈ રહ્યો છે, જે મેરઠથી પ્રયાગરાજ સુધી ફેલાયેલો છે અને 12 જિલ્લાઓને જોડશે.
લખનૌથી મેરઠ સુધીનું અંતર 6-8 કલાકમાં પૂર્ણ કરી શકાશે
આ એક્સપ્રેસવે શરૂ થતાં મુસાફરીના સમયમાં નોંધપાત્ર ઘટાડો થશે. ખાસ કરીને લખનૌથી મેરઠ સુધીનું અંતર હવે માત્ર 6થી 8 કલાકમાં પૂર્ણ કરી શકાશે, જેના કારણે રાજ્યમાં કનેક્ટિવિટી વધુ મજબૂત બનશે અને મુસાફરોને ઝડપી અને સુવિધાજનક યાત્રાનો લાભ મળશે. પ્રોજેક્ટના ઉદ્ઘાટન પહેલા મુખ્યમંત્રી યોગી આદિત્યનાથે મલ્લાવાંમાં જઈને તૈયારીઓની સમીક્ષા કરી હતી. તેમણે કાર્યક્રમ સ્થળ પર મંચ, પંડાલ, સુરક્ષા વ્યવસ્થા, VIP બેઠક વ્યવસ્થા તેમજ સામાન્ય જનતા માટેના આયોજનનું નિરીક્ષણ કર્યું હતું. સાથે જ તેમણે અધિકારીઓ સાથે બેઠક કરીને તમામ તૈયારીઓ સમયસર પૂર્ણ કરવાની સૂચનાઓ આપી હતી.
