તાજમહેલ સંકુલની વુઝુ ટાંકીમાં વાંદરાઓની ‘પૂલ પાર્ટી’નો વીડિયો સોશિયલ મીડિયા પર વાયરલ. જાણો આ રમુજી ઘટના બાદ સુરક્ષા વ્યવસ્થા પર કેમ ઉઠ્યા ગંભીર સવાલો.
India| By Sandesh Team | Published: Jun 06, 2026 10:41 am
વાંદરાઓની મસ્તી જોઈ પર્યટકો ખુશ
વિશ્વની સાત અજાયબીઓમાંના એક એવા ઐતિહાસિક વારસા તાજમહેલમાંથી એક અનોખો અને અત્યંત રમૂજી વીડિયો સામે આવ્યો છે, જે સોશિયલ મીડિયા પર ધૂમ મચાવી રહ્યો છે. સામાન્ય રીતે પોતાની સુંદરતા માટે જાણીતા તાજમહેલ સંકુલમાં આ વખતે વાંદરાઓના એક જૂથે પ્રવાસીઓનું ધ્યાન ખેંચ્યું છે. વાયરલ વીડિયોમાં વાંદરાઓ પાણીની ટાંકીમાં ડાઇવિંગ કરીને મસ્તીથી તરતા જોવા મળે છે, જેને ઇન્ટરનેટ યુઝર્સ 'વાંદરાઓની પૂલ પાર્ટી' કહી રહ્યા છે.
તાજમહલમાં વાનરોની પૂલ પાર્ટી, પ્રવાસીઓને મનોરંજન
તાજમહેલ સંકુલની અંદર આવેલી એક પાણીની ટાંકી (વુઝુ ટેન્ક) પાસે અચાનક કેટલાક વાંદરાઓ આવી પહોંચ્યા હતા અને કોઈપણ ડર વગર પાણીમાં કૂદી પડ્યા હતા. દેશ-વિદેશથી આવેલા પ્રવાસીઓ માટે આ નજારો આશ્ચર્ય અને મનોરંજન બંને લઈને આવ્યો હતો. ત્યાં હાજર મોટાભાગના લોકોએ પોતાના ફોન કાઢીને વાંદરાઓના આ સ્વિમિંગ સેશનને કેમેરામાં કેદ કરવાનું શરૂ કરી દીધું હતું.
સોશિયલ મીડિયા પર કેટલીક પોસ્ટમાં એવો ભ્રામક દાવો કરવામાં આવ્યો હતો કે વાંદરાઓએ તાજમહેલના મુખ્ય ગુંબજ સામે આવેલા મુખ્ય ફુવારાને સ્વિમિંગ પૂલ બનાવી દીધો છે. જોકે, પુરાતત્વ વિભાગના અધિકારીઓએ આ દાવાને નકારી કાઢતા સ્પષ્ટતા કરી છે કે આ વીડિયો મુખ્ય ફુવારાનો નથી. વાંદરાઓ જે ટાંકીમાં નહાઈ રહ્યા છે તે મુખ્ય મકબરા અને મસ્જિદ વચ્ચે આવેલી 'વુઝુ ટાંકી' (Ablution Tank) છે. આ ટાંકીનો ઉપયોગ ભક્તો મસ્જિદમાં નમાઝ પઢતા પહેલા હાથ-મોં ધોવા (વુઝુ કરવા) માટે કરે છે.
રમૂજી વીડિયો પાછળ સુરક્ષાની ગંભીર ચૂક
આ વીડિયો ભલે જોવામાં રમુજી લાગે, પરંતુ તેણે ભારતીય પુરાતત્વ સર્વેક્ષણ (ASI) અને તાજમહેલની હાઈ-સિક્યોરિટી વ્યવસ્થા પર ગંભીર સવાલો ઉભા કર્યા છે. ઇન્ટરનેટ યુઝર્સ ચિંતા વ્યક્ત કરી રહ્યા છે કે આટલા સંવેદનશીલ અને ઉચ્ચ સુરક્ષા ધરાવતા વિસ્તારમાં વાંદરાઓ આટલી સરળતાથી કેવી રીતે પહોંચી ગયા? પ્રવાસીઓની સુરક્ષા માટે વાંદરાઓને સંકુલમાં પ્રવેશતા અટકાવવાની પૂરતી વ્યવસ્થા કેમ નથી?
