જમ્મુ કાશ્મીરમાં થયેલા હુમલા બાદ ભારત અને પાકિસ્તાન વચ્ચે તણાવ વધી રહ્યો છે. ભારતે સ્પષ્ટ કરી દીધું છે કે હવે તે માત્ર પીઓકે પરત લેવા મુદ્દે જ પાકિસ્તાન સાથે વાત કરશે. ભારતે કાશ્મીર મુદ્દે મધ્યસ્થતાની ઓફર ફગાવી દીધી છે. ભારતની ત્રણેય સેના દ્વારા પ્રેસ કોન્ફરન્સ યોજાઈ હતી. જેમાં ભારતીય સેનાના ડાયરેક્ટર જનરલ મિલિટરી ઓપરેશન્સ (DGMO) લેફ્ટનન્ટ જનરલ રાજીવ ઘાઈ, વાયુસેનાના ડાયરેક્ટર જનરલ એર ઓપરેશન્સ એર માર્શલ અવધેશ કુમાર ભારતી અને ભારતીય નૌકાદળના ડાયરેક્ટર જનરલ નવલ ઓપરેશન્સે ઓપરેશન સિંદૂર અંગે માહિતી આપી હતી.
આ ઓપરેશન દરમિયાન ભારતીય સેનાના પાંચ જવાનો શહીદ થયા
DGMO લેફ્ટનન્ટ જનરલ રાજીવ ઘાઈએ કહ્યું હતું કે, પહલગામ હુમલાનો જવાબ આપવો જરૂરી હતો. ઓપરેશન સિંદૂરનો ઉદ્દેશ્ય ફક્ત આતંકવાદીઓને ખતમ કરવાનો હતો.અમે 100 આતંકવાદીઓનો સફાયો કરી નાંખ્યો છે.પાકિસ્તાન અને પીઓકેમાં આતંકવાદી ઠેકાણાને ઉડાવી દેવાના પુરાવા પણ બતાવ્યા છે. ભારતીય સેનાએ આતંકવાદી હુમલાનો જવાબ આપ્યો છે. સેનાની કાર્યવાહીમાં મુદસ્સર ખાર, હાફિઝ જમીલ અને યુસુફ અઝહર જેવા ત્રણ મોટા આતંકવાદીઓ માર્યા ગયા છે.પાકિસ્તાને ભૂતકાળમાં ભારતીય સેનાના ઠેકાણાઓને નિશાન બનાવવાના અનેક પ્રયાસો કર્યા છે. પરંતુ આ પ્રયાસો મોટાભાગે નિષ્ફળ રહ્યા છે. પાકિસ્તાને ડ્રોન અને મિસાઇલો દ્વારા અનેક લશ્કરી ઠેકાણાઓ પર હુમલો કરવાનો પ્રયાસ કર્યો,પરંતુ ભારતની એર ડિફેન્સ સિસ્ટમે સમયસર આ બધા જોખમોને નિષ્ફળ બનાવ્યા છે. આ ઓપરેશન દરમિયાન ભારતીય સેનાના પાંચ જવાનો શહીદ થયા છે.
ભારતીય વાયુસેનાએ મુરીદકે અને બહાવલપુર જેવા આતંકવાદી ઠેકાણાઓ પર હુમલો કર્યો
એર માર્શલ એકે ભારતીએ કહ્યું હતુંકે, ભારતીય વાયુસેનાએ મુરીદકે અને બહાવલપુર જેવા આતંકવાદી ઠેકાણાઓ પર હુમલો કર્યો.આ બંને સ્થાનો આંતરરાષ્ટ્રીય સરહદની અંદર ખૂબ અંદર હતા, તેથી તેમને પસંદ કરવાનું વ્યૂહાત્મક રીતે મહત્વપૂર્ણ હતું.IAF એ ચોક્કસ હુમલાઓ માટે સેટેલાઇટ અને ગુપ્ત માહિતી આધારિત લક્ષ્ય અને ચોકસાઇવાળા દારૂગોળોનો ઉપયોગ કર્યો હતો. ભારતીય વાયુસેનાએ ખૂબ જ કાળજીપૂર્વક ફક્ત આતંકવાદીઓના ઠેકાણાઓને જ નિશાન બનાવ્યા અને કોઈ પણ નાગરિકને જાનહાનિ થવા દીધી નહીં.અમે આખી યોજના એવી રીતે બનાવી હતી કે ફક્ત આતંકવાદી છાવણીઓ પર જ ચોકસાઈથી હુમલો કરવામાં આવે અને કોઈ પણ નાગરિકને નુકસાન ન થાય.
એર માર્શલ એકે ભારતીએ હુમલાના ડ્રોન અને સેટેલાઇટ ફૂટેજ રજૂ કર્યા
ભારતીય વાયુસેના દ્વારા એક સચોટ મિસાઇલ હુમલામાં પાકિસ્તાનના મુરીદકેમાં સ્થિત આતંકવાદી છાવણીને સંપૂર્ણપણે નાશ કરવામાં આવી હતી. આ એ જ વિસ્તાર છે જેને લશ્કર-એ-તૈયબાના વડા હાફિઝ સઈદનો ગઢ માનવામાં આવે છે. ઓપરેશન સિંદૂર હેઠળ, ભારતીય વાયુસેનાએ પાકિસ્તાનના બહાવલપુરમાં આતંકવાદી ઠેકાણા પર સચોટ મિસાઇલ હુમલો કર્યો અને તેને સંપૂર્ણપણે નષ્ટ કરી દીધા. આ વિસ્તારને જૈશ-એ-મોહમ્મદનું મુખ્ય ઠેકાણું માનવામાં આવે છે, જ્યાંથી લાંબા સમયથી ભારત વિરુદ્ધ આતંકવાદી પ્રવૃત્તિઓ ચલાવવામાં આવી રહી હતી.એર માર્શલ એકે ભારતીએ હુમલાના ડ્રોન અને સેટેલાઇટ ફૂટેજ રજૂ કર્યા હતાં. જેમાં બહાવલપુરમાં થયેલા મોટા પાયે વિનાશને સ્પષ્ટપણે જોઈ શકાય છે.
પાકિસ્તાનની એર ડિફેન્સ સિસ્ટમને નિશાન બનાવી
એર માર્શલ એકે ભારતીએ જણાવ્યું હતું કે ભારતે પાકિસ્તાન પર હુમલો કર્યો જ્યાં તેને સૌથી વધુ નુકસાન થયું.પાકિસ્તાનના વાયુસેનાના મથકો, કમાન્ડ સેન્ટરો, લશ્કરી માળખાગત સુવિધાઓ અને એર ડિફેન્સ સિસ્ટમને નિશાન બનાવી. ભારતીય હુમલાઓમાં ચકલાલા, રફીક અને રહીમ યાર ખાન જેવા મહત્વપૂર્ણ એરબેઝનો સમાવેશ થતો હતો.સરગોધા, ભૂલારી અને જેકોબાદ જેવા અન્ય મહત્વપૂર્ણ લશ્કરી મથકો પર પણ હુમલો કરવામાં આવ્યો. તેમણે કહ્યું કે અમારી પાસે આ બધા સ્થળોની દરેક સિસ્ટમને લક્ષ્ય બનાવવાની અને તેનાથી આગળ વધવાની સંપૂર્ણ ક્ષમતા છે.
પાકિસ્તાનનું કરાચી પણ ટાર્ગેટ પર હતું
ભારતીય નૌકાદળના ડાયરેક્ટર જનરલ નવલ ઓપરેશન્સ (DGNO), વાઇસ એડમિરલ એ.એન.પ્રમોદે જણાવ્યું હતું કે પહેલગામ હુમલા પછી,ભારતીય નૌકાદળના સંસાધનોને સંપૂર્ણ યુદ્ધ તૈયારીમાં સમુદ્રમાં તૈનાત કરવામાં આવ્યા હતા.તેમણે કહ્યું કે આતંકવાદી હુમલાના 96 કલાકની અંદર,અમે અરબી સમુદ્રમાં અનેક શસ્ત્ર પરીક્ષણો દરમિયાન અમારી વ્યૂહરચના અને કાર્યકારી પ્રક્રિયાઓનું પરીક્ષણ અને સુધારો કર્યો.ભારતીય નૌકાદળની શક્તિશાળી હાજરીને કારણે પાકિસ્તાનને તેની નૌકાદળ અને વાયુસેનાને બંદરો અને દરિયાકાંઠાના વિસ્તારોમાં મર્યાદિત રાખવાની ફરજ પડી, જેના પર સતત નજર રાખવામાં આવતી હતી.અમે એવા સ્થળોને નિશાન બનાવવાની તૈયારી કરી હતી જ્યાં જરૂર પડ્યે હુમલો થઈ શકે છે.જેમાં કરાચીનો પણ સમાવેશ થતો હતો.તેમણે એ પણ સ્પષ્ટ કર્યું કે ભારતીય નૌકાદળ હજુ પણ સંપૂર્ણ તાકાત સાથે સમુદ્રમાં હાજર છે અને કોઈપણ પ્રતિકૂળ કાર્યવાહીનો નિર્ણાયક જવાબ આપવા માટે તૈયાર છે.
