Chennai-Dubai જઇ રહેલા વિમાનમાંથી નીકળ્યા ધૂમાડાના ગોટેગોટા, 300 મુસાફરોના શ્વાસ અધ્ધર

ચેન્નાઈ એરપોર્ટથી દુબઈ જઈ રહેલા પ્લેનમાંથી ટેકઓફ પહેલા જ અચાનક ધુમાડો નીકળવા લાગ્યો હતો. આ ઘટના બાદ એરપોર્ટ પર ભારે હોબાળો મચી ગયો છે. 300 મુસાફરોમાં ભયનો માહોલ સર્જાયો હતો.

મળતી માહિતી મુજબ, તમિલનાડુના ચેન્નાઈ એરપોર્ટ પર મંગળવારે રાત્રે એક મોટી દુર્ઘટના ટળી હતી. ચેન્નાઈ એરપોર્ટથી દુબઈ જઈ રહેલા પ્લેનના ટેકઓફ પહેલા અચાનક જ વિંગ એરિયામાંથી ધુમાડો નીકળવા લાગ્યો હતો. મળતી માહિતી મુજબ આ ફ્લાઈટમાં કુલ 320 પેસેન્જર્સ સવાર થવાના હતા પરંતુ આ ઘટના બાદ તેમનામાં ગભરાટ ફેલાઈ ગયો હતો.

કેવી રીતે બની આ ઘટના?

ચેન્નાઈ ઈન્ટરનેશનલ એરપોર્ટથી અમીરાતની ફ્લાઈટ મંગળવારે રાત્રે 9.50 કલાકે દુબઈ માટે ઉપડવાની હતી. મળતી માહિતી મુજબ, આ ફ્લાઈટમાં 320 મુસાફરો બેસવા માટે રાહ જોઈ રહ્યા હતા. મુસાફરો ચઢે તે પહેલા વિમાનમાં ઇંધણ ભરવામાં આવ્યું હતું. ત્યારે એન્જિનમાં ઓવરફિલિંગને કારણે અચાનક ધુમાડો નીકળવા લાગ્યો હતો. આ જોઈને સ્ટાફ ડરી ગયો.

ધુમાડો શાના કારણે થયો?

અકસ્માતના સમાચાર મળ્યા બાદ એરપોર્ટ ફાયર સ્ટેશન પર પહોંચેલા ફાયરના જવાનો ધુમાડો ઓલવવામાં વ્યસ્ત હતા. તપાસમાં બહાર આવ્યું છે કે એરક્રાફ્ટમાંથી ધુમાડો વધુ પડતા ઇંધણને કારણે ગરમીને કારણે થયો હતો. આ પછી ફાયરના જવાનોએ તાત્કાલિક ત્યાં પહોંચીને આગને કાબુમાં લીધી હતી, જેના કારણે મોટી દુર્ઘટના ટળી હતી. ઘટનાને કારણે ફ્લાઈટમાં મુસાફરી કરી રહેલા તમામ મુસાફરોને વેઈટિંગ રૂમમાં રાખવામાં આવ્યા હતા.

પ્લેન ક્યારે ઉપડશે?

પ્લેનમાં ઈંધણ ભરતી વખતે ધુમાડો નીકળવાની ઘટનાથી ચેન્નાઈ એરપોર્ટ પર ભારે હંગામો મચી ગયો છે. અગ્નિશમન દળના જવાનોએ ધુમાડો સંપૂર્ણપણે દૂર કરી દીધો છે. જોકે, શું પ્લેનમાં કોઈ નુકસાન થયું હતું? શું પ્લેન ટેક ઓફ કરવા માટે તૈયાર છે? હાલમાં અધિકારીઓ આ મામલે તપાસ કરી રહ્યા છે. અધિકારીઓએ કહ્યું છે કે દુબઈ જતી ફ્લાઈટમાં વિલંબ થશે કારણ કે તેને ઈન્સ્પેક્શન બાદ ટેક ઓફ કરવું પડશે.