NIAની ટીમે મંગળવારે તમિલનાડુમાં 11 સ્થળોએ દરોડા પાડ્યા હતા. ટીમની શોધખોળ ચાલુ છે. કહેવામાં આવી રહ્યું છે કે, આ દરોડા ISISના આતંકવાદ અને આતંકી ફંડિંગ અને ભરતીને લઈને ચાલી રહ્યા છે.
વિશ્વના વિવિધ દેશોમાં પ્રતિબંધિત સંગઠન હિઝબુત તહરિરમાં ભરતી માટે લોકોનું બ્રેઈનવોશ કરવાના કેસમાં મંગળવારે મોટી કાર્યવાહી કરવામાં આવી હતી. ચેન્નાઈ સેન્ટ્રલ ક્રાઈમ બ્રાન્ચ દ્વારા નોંધાયેલ કેસની તપાસ નેશનલ ઈન્વેસ્ટિગેશન એજન્સીને સોંપવામાં આવી છે. આ પછી NIAએ આજે કાર્યવાહી કરી હતી. આજની કાર્યવાહી દરમિયાન કોઈની ધરપકડ કરવામાં આવી હોવાની કે કોઈ વાંધાજનક દસ્તાવેજો મળી આવ્યા હોવાની કોઈ માહિતી નથી.
ચેન્નાઈ સેન્ટ્રલ ક્રાઈમ બ્રાન્ચમાં નોંધાયેલા કેસ મુજબ, રોયાપેટ્ટાહના પિતા અને પુત્ર સહિત ત્રણ લોકો અને તેમના સહયોગીઓએ વિશ્વના વિવિધ દેશોમાં પ્રતિબંધિત સંગઠન હિઝબુત-તહરિરમાં જોડાવા માટે વિવિધ લોકોનું બ્રેઈનવોશ કર્યું હતું.
આ મામલો આતંકવાદ સાથે સંબંધિત હોવાથી તેની ગંભીરતાને ધ્યાનમાં લઈને આ કેસ નેશનલ ઈન્વેસ્ટિગેશન એજન્સી (NIA)ના અધિકારીઓને સોંપવામાં આવ્યો હતો. NIAએ કેસ નોંધીને નવેસરથી તપાસ શરૂ કરી છે. આ કેસમાં અગાઉ પકડાયેલા આરોપીઓની પૂછપરછ કરીને ષડયંત્રનો પર્દાફાશ કરવામાં આવી રહ્યો છે. એ જ આરોપીઓના ખુલાસાના આધારે, આજે સવારથી NIA અધિકારીઓએ ચેન્નાઈમાં તાંબરમ, પુદુક્કોટ્ટાઈ અને કન્યાકુમારીમાં દસથી વધુ સ્થળોએ તપાસ હાથ ધરી હતી.
નેશનલ ઇન્વેસ્ટિગેશન એજન્સીના અધિકારીઓના જણાવ્યા અનુસાર, ધરપકડ કરાયેલ વ્યક્તિઓ અને શંકાસ્પદ વ્યક્તિઓના સંપર્કમાં રહેલા લોકોની સંબંધિત સ્થળોએ શોધ કરવામાં આવી રહી છે. તેમજ આ કેસમાં પાંચ લોકોની ધરપકડ કરી બે વખત રિમાન્ડ પર લઈ પૂછપરછ કરવામાં આવી રહી છે.
