UP: મેરઠમાં 3 પુત્રીઓના બેડ બોક્સમાંથી મળ્યા મતૃદેહ, મા-બાપની હત્યા

મેરઠમાં એક જ પરિવારના પાંચ લોકોની હત્યાનું રહસ્ય ઘુંટાવા લાગ્યુ છે કારણ કે ઘર બહારથી બંધ હતું અને અંદરથી પતિ, પત્ની અને તેમની ત્રણ પુત્રીઓના મૃતદેહ મળી આવ્યા હતા. એટલું જ નહીં, જે સંજોગોમાં મૃતદેહો મળી આવ્યા હતા તે જોતા એવું લાગે છે કે હત્યારાઓ આ મૃતદેહોને બીજે ક્યાંક લઈ જઈને તેનો નિકાલ કરવા માંગતા હતા. પીડિત પરિવારના સંબંધીઓએ જણાવ્યું કે મોઈનના આ ત્રીજા લગ્ન હતા, જ્યારે અસ્માના બીજા લગ્ન હતા.

ઘરનો તમામ સામાન વેરવિખેર જોવા મળ્યો હતો

આ ઘટના શહેરના લીસાડી ગેટ પોલીસ સ્ટેશન વિસ્તારના સોહેલ ગાર્ડનમાં બની હતી. આ દરમિયાન ઘરનો તમામ સામાન વેરવિખેર જોવા મળ્યો હતો. રૂમની અંદરથી પતિ-પત્નીના મૃતદેહ હાથ-પગ બાંધેલા મળી આવ્યા હતા, જ્યારે ત્રણ પુત્રીઓના મૃતદેહ બેડ બોક્સની અંદરથી મળી આવ્યા હતા. આ બનાવથી વિસ્તારમાં સનસનાટી ફેલાઈ ગઈ હતી. આ માહિતી મળતા જ ઘરની બહાર લોકોની ભીડ એકઠી થઈ ગઈ હતી.

 પોલીસ અને ફોરેન્સિક ટીમ ઘટનાસ્થળે પહોંચી અને પુરાવા એકઠા કર્યા

મૃતકોની ઓળખ મોઈન, આસ્મા, અફશા (8), અઝીઝા (4) અને અદીબા (1) તરીકે થઈ છે. મૃતક મોઈન મિકેનિક તરીકે કામ કરતો હતો. પોલીસને ત્રણેય બાળકીના મૃતદેહ બેડ બોક્સની અંદરથી મળી આવ્યા હતા. સૌથી નાની છોકરીનો મૃતદેહ એક કોથળામાં મળી આવ્યો હતો, જે બેડ બોક્સમાં રાખવામાં આવ્યો હતો. કહેવામાં આવી રહ્યું છે કે પરિવાર બુધવાર સાંજથી ગુમ હતો. તેમને કોઈએ જોયા ન હતા અને ગુરુવારે તેમના ઘરમાંથી તેમના મૃતદેહ મળી આવ્યા હતા. માહિતી બાદ પોલીસ અને ફોરેન્સિક ટીમ ઘટનાસ્થળે પહોંચી અને પુરાવા એકઠા કર્યા.

આ ઘટના બાદ ઘરના દરવાજાને બહારથી તાળું મારી દેવામાં આવ્યું હતું. સવારથી સંબંધીઓ અને ભાઈઓ ફોન કરી રહ્યા હતા, પરંતુ કોલનો જવાબ આપવામાં આવતો ન હતો અને પાડોશીએ પણ આખો દિવસ તેમને જોયા ન હતા. ઘટનાની માહિતી મળતા જ તમામ પોલીસ અધિકારીઓ એડીજી ડીજે ઠાકુર, ડીઆઈજી કલાનિધિ નૈથાની, એસએસપી વિપિન ટાડા અને જિલ્લા મેજિસ્ટ્રેટ દીપક મીણા પણ ઘટનાસ્થળે પહોંચી ગયા હતા. પોલીસે ઘટનાસ્થળેથી કેટલાક શકમંદોની પણ અટકાયત કરી છે, જેમની પૂછપરછ કરવામાં આવી રહી છે.

મોઇન આ વિસ્તારમાં મકાન બનાવી રહ્યો હતો

મોઈન લગભગ દોઢ મહિના પહેલા પરિવાર સાથે આ વિસ્તારમાં પહોંચ્યો હતો અને ત્યાં ભાડા પર ઘર લીધું હતું. ઘરની દિવાલો પર પ્લાસ્ટર પણ નહોતું. મોઇને પણ આ જ વિસ્તારમાં પ્લોટ લીધો હતો અને ત્યાં તેનું ઘર તૈયાર કરતો હતો. ઘરના નિર્માણની ઉજવણીમાં આસ્માએ લાડુનું પણ વિતરણ કર્યું હતું. વિસ્તારના લોકો અને પરિવારના લોકો આશ્ચર્યમાં છે કે હસતા હસતા પરિવારની હત્યા કોણે કરી.