Uttarakhand: મસૂરી રોડ પર કાર ખીણમાં ખાબકી, યુવક-યુવતીનું મોત, 3 ગંભીર

• દેહરાદૂન-મસૂરી રોડ કાર ખાડામાં ખાબકી
  
• ઘટનામાં યુવક અને યુવતીનું મોત, 3 ગંભીર
• ઇજાગ્રસ્તને સારવાર અર્થે હોસ્પિટલ ખસેડાયા

ઉત્તરાખંડમાં દેહરાદૂન-મસૂરી રોડ પર સોમવારે સવારે એક દુઃખદ અકસ્માત સર્જાયો હતો. રાજપુર વિસ્તારમાં આવેલા પર્યટન સ્થળ શિખર ફોલ પાસે સોમવારે એક જીપ ઊંડી ખીણમાં પડી હતી. તેમાં મુસાફરી કરી રહેલા એક યુવક અને યુવતીનું ઘટનાસ્થળે જ મોત થયું હતું અને અન્ય ત્રણ ઘાયલ થયા હતા. આ બનાવથી વિસ્તારમાં ચકચાર મચી ગઈ હતી. જ્યારે લોકોએ ચીસો સાંભળી તો પોલીસને ઘટનાની જાણ કરવામાં આવી.

ખીણમાંથી 3 લોકોને બચાવ્યા

સવારે પાંચ લોકો શિખર ધોધની મુલાકાત લઈને ઘરે પરત ફરી રહ્યા હતા ત્યારે આ અકસ્માત થયો હતો. માહિતી મળતાં જ પોલીસ અને સ્ટેટ ડિઝાસ્ટર રિસ્પોન્સ ફોર્સની ટીમ ઘટનાસ્થળે પહોંચી હતી અને બચાવ કામગીરી હાથ ધરી હતી. આ અકસ્માતમાં બે વ્યક્તિના ઘટનાસ્થળે જ મોત થયા હતા. અન્ય ત્રણને ઈજાગ્રસ્ત હાલતમાં ખાઈમાંથી બહાર કાઢી હોસ્પિટલમાં લઈ જવામાં આવ્યા હતા જ્યાં તેમની સારવાર ચાલી રહી છે.

જીપની બ્રેક ફેઈલ થતા બની ઘટના

પૂછપરછ દરમિયાન ઘાયલોએ પોલીસને જણાવ્યું કે તેઓ શિખર ધોધની મુલાકાત લઈને પાછા ફરી રહ્યા હતા અને અચાનક તેમની જીપની બ્રેક ફેલ થઈ ગઈ અને તે કાબૂ બહાર ગઈ અને રસ્તાની નીચે ખાડામાં પડી ગઈ. મૃતકોની ઓળખ દહેરાદૂનના પોશ તેગ બહાદુર રોડના રહેવાસી આયુષ શર્મા (30) અને દહેરાદૂનના કૌલાગઢ રોડની રહેવાસી અવની કુકરેતી (29) તરીકે થઈ છે. શર્મા મર્ચન્ટ નેવીમાં કામ કરતી હતી જ્યારે અવની મસૂરી રોડ પર એક કાફે ચલાવતી હતી.