'ધ્યાન રાખજો કોઈ બળવાખોર...' અમિત શાહનો મહાયુતિ નેતાઓને સ્પષ્ટ સંદેશ

મહારાષ્ટ્ર વિધાનસભા ચૂંટણીને લઈને ઉત્તેજના તેજ થઈ ગઈ છે. રાજ્યમાં સત્તાધારી મહાયુતિ ગઠબંધનમાં બેઠકોની વહેંચણીને લઈને ગૃહમંત્રી અમિત શાહના નિવાસસ્થાને આજે બેઠક યોજાઈ હતી. આ દરમિયાન અમિત શાહે અજિત પવાર અને એકનાથ શિંદેને સ્પષ્ટ સંદેશો આપ્યો કે બળવાખોરોને ઊભા ન કરવામાં આવે. તેમણે કહ્યું કે, ત્રણેય (ભાજપ, શિંદે જૂથ અને અજીત જૂથ)એ સાથે મળીને ચૂંટણી લડવી જોઈએ.

મુંબઈથી દિલ્હી સુધી બેઠકોનો દોર

મહારાષ્ટ્રમાં ચૂંટણીને લઈને મહાયુતિ કેમ્પમાં ભારે હલચલ જોવા મળી રહી છે. મુંબઈથી દિલ્હી સુધી મંથનનો તબક્કો ચાલી રહ્યો છે. આજે મહાયુતિના નેતાઓ બપોરે દિલ્હી પહોંચ્યા હતા, જ્યાં અમિત શાહના નિવાસસ્થાને બેઠકોની વહેંચણીને લઈને ચર્ચા થઈ હતી. મળતી માહિતી મુજબ અમિત શાહે કહ્યું કે, એકબીજાના બળવાખોરોને ટિકિટ ન આપવી જોઈએ.

મહાયુતિ ગઠબંધનના પક્ષોએ ઉમેદવારોની પ્રથમ યાદી જાહેર કરી દીધી છે

શાસક પક્ષ તરફથી ભારતીય જનતા પાર્ટી (BJP), મુખ્યમંત્રી એકનાથ શિંદેની શિવસેના, અજિત પવારની આગેવાનીવાળી રાષ્ટ્રવાદી કોંગ્રેસ પાર્ટીએ ઉમેદવારોની પ્રથમ યાદી જાહેર કરી છે, જ્યારે વિપક્ષ તરફથી મહા વિકાસ અઘાડી (MVA), ઉદ્ધવ ઠાકરેની આગેવાનીવાળી શિવસેનાએ ઉમેદવારોની પ્રથમ યાદી જાહેર કરી છે. સેના (યુબીટી) અને શરદ જૂથે પણ પ્રથમ યાદી બહાર પાડી છે.

અજીત જૂથે 38 ઉમેદવારોની પ્રથમ યાદી જાહેર

મહારાષ્ટ્ર વિધાનસભાને ધ્યાનમાં રાખીને અજીત જૂથે 38 ઉમેદવારોની પ્રથમ યાદી જાહેર કરી છે. જેમાં 95% વર્તમાન ધારાસભ્યોને ફરીથી ટિકિટ આપવામાં આવી છે. નવાબ મલિક અને સના મલિકના નામ આ યાદીમાં મોટા નેતાઓમાં સામેલ નથી. અજિત પવાર પોતે બારામતીથી ચૂંટણી લડશે.

NCP શરદ પવાર જૂથના 45 ઉમેદવારોની યાદી જાહેર

મહારાષ્ટ્ર NCP પ્રમુખ જયંત પાટીલે પ્રેસ કોન્ફરન્સમાં ઉમેદવારોની યાદી જાહેર કરી. યાદીમાં 45 નામ છે. સૌથી મહત્વની વાત એ છે કે આ યાદીમાં યુગેન્દ્ર પવારને બારામતી સીટ પરથી ઉતારવાની જાહેરાત કરવામાં આવી છે. આ એ જ સીટ છે જ્યાંથી અજિત પવાર ધારાસભ્ય છે. NCP શરદ પવાર જૂથે મહારાષ્ટ્ર ચૂંટણી માટે ઉમેદવારોની પ્રથમ યાદી જાહેર કરી છે. આ યાદીમાં 45 નામ છે. શરદ પવારે તેમના ભત્રીજા અજિત પવાર સામે બારામતીથી ઉમેદવારનું નામ પણ જાહેર કર્યું છે. ખાસ વાત એ છે કે શરદ પવારે અહીંથી તેમના પૌત્ર યુગેન્દ્ર પવારને ટિકિટ આપી છે.

મહારાષ્ટ્રમાં 20 નવેમ્બરે મતદાન

ઉલ્લેખનીય છે કે, મહારાષ્ટ્રમાં 288 વિધાનસભા સીટો છે. રાજ્યમાં ભાજપ, શિવસેના (એકનાથ શિંદે) અને એનસીપી (અજિત પવાર)ની ગઠબંધન સરકાર છે. 2019ની ચૂંટણીમાં ભાજપે સૌથી વધુ 105 બેઠકો જીતી હતી. આ વખતે પણ મહાયુતિ પુરી તાકાત સાથે મેદાનમાં ઉતરવા જઈ રહી છે. જો કે, સીટ વહેંચણીને લઈને હજુ સુધી કોઈ સ્પષ્ટ ફોર્મ્યુલા સામે આવી નથી. હાલ ભાજપના 103 ધારાસભ્યો છે. શિવસેના (શિંદે) પાસે 40 અને NCP (અજિત) પાસે 43 ધારાસભ્યો છે.