- તમને લોન મળશે કે નહીં તે તમારા ક્રેડિટ સ્કોર પર છે
- જેને લોકો સામાન્ય ભાષામાં CIBIL સ્કોર કહે છે
- ક્રેડિટ બ્યુરો દ્વારા ક્રેડિટ સ્કોર્સની ગણતરી કરવામાં આવે છે
જા તમારે લોનની જરૂર છે પણ બેંક તમને લોન આપશે કે નહીં તે તમારા ક્રેડિટ સ્કોર પર આધાર રાખે છે. જેને લોકો સામાન્ય ભાષામાં CIBIL સ્કોર કહે છે. તે 300 અને 900 વચ્ચેની ત્રણ-અંકની સંખ્યા છે. આ નંબર તમારો ક્રેડિટ હિસ્ટ્રી છે. ઉદાહરણ તરીકે, તમે પહેલાં લોન લીધી છે કે નહીં. જો લીધી છે તો તેની સમયસર ચૂકવણી કરી છે કે કેમ તે પણ જોવામાં આવે છે. જો તમે માત્ર લોન માટે તપાસ કરી હોય તો પણ તેનો રેકોર્ડ પણ આ નંબરોમાં કેપ્ચર થઈ જાય છે.
ક્રેડિટ સ્કોર કેવી રીતે નક્કી થાય છે?
દેશના મુખ્ય ક્રેડિટ બ્યુરો દ્વારા તમારા ક્રેડિટ સ્કોર્સની ગણતરી કરવામાં આવે છે. RBIએ આ માટે ચાર ક્રેડિટ ઈન્ફોર્મેશન કંપનીઓને લાઇસન્સ આપ્યું છે - જેમાં CIBIL, સીઆરઆઈએફ હાઈમાર્ક, એક્સપિરિયન અને ઈક્વિફેક્સનો સમાવેશ થાય છે. CIBIL બ્યુરો એટલો પ્રખ્યાત છે કે લોકો ક્રેડિટ સ્કોરને CIBIL સ્કોર કહેવા લાગ્યા છે. આ કંપનીઓ તમારા ક્રેડિટ સ્કોરનું મૂલ્યાંકન કરે છે, જે તમારા નાણાકીય પરિસ્થિતિને છતી કરે છે.
ક્રેડિટ સ્કોરનું મહત્વ
તમારે ક્રેડિટ કાર્ડ લેવું હોય કે કોઈપણ જરૂરી કામ માટે લાખોની લોન લેવી હોય, ક્રેડિટ સ્કોર હંમેશા જરૂરી છે. જો તમારો ક્રેડિટ સ્કોર સારો છે, તો તમને સરળ શરતો પર લોન મળશે અને વ્યાજદર કે લોનની ચુકવણીના સમયગાળામાં કેટલીક છૂટ પણ મળી શકે છે. પરંતુ, જો ક્રેડિટ સ્કોર ખરાબ છે, તો બેંકો લોન આપવાનો ઇનકાર કરી શકે છે. જો તેઓ લોન આપશે તો પણ તે કડક શરતો અને ઊંચા વ્યાજ દરો સાથે હશે.
શા માટે ક્રેડિટ સ્કોર ઘટે છે?
ઓછા ક્રેડિટ સ્કોર માટે ઘણા કારણો હોઈ શકે છે. જેમ કે લોનનો હપ્તો તૂટવો, ક્રેડિટ કાર્ડની ચુકવણીમાં વિલંબ, જૂનું ક્રેડિટ કાર્ડ બંધ કરવું. જો તમે ટૂંકા ગાળામાં ક્રેડિટ કાર્ડ અથવા લોન માટે વારંવાર પૂછપરછ કરો છો, તો પણ તમારો ક્રેડિટ સ્કોર ઘટી શકે છે. સારો ક્રેડિટ સ્કોર જાળવવા માટે, ક્રેડિટ કાર્ડ બિલ અને અન્ય EMI સમયસર ચૂકવવા જોઈએ.
કેટલો સારો ક્રેડિટ સ્કોર
650 થી 749ના ક્રેડિટ સ્કોરને સારો માનવામાં આવે છે. તે તમને સામાન્ય વ્યાજ દરે લોન મેળવી શકે છે. 750 થી 799 નો ક્રેડિટ સ્કોર ઘણો સારો છે. આ સ્કોર ધરાવતા લોકોને આકર્ષક વ્યાજ દરે લોન મળી શકે છે. 800 થી 900 નો ક્રેડિટ સ્કોર ઉત્તમ માનવામાં આવે છે. તમે તમારા ક્રેડિટ સ્કોર મુજબ લોનમાં કેટલીક છૂટ મેળવી શકો છો.
ક્રેડિટ સ્કોર આનાથી ઓછો ન હોવો જોઈએ
ક્રેડિટ સ્કોર 300 પોઇન્ટથી શરૂ થાય છે. જો તમારો સ્કોર 549 સુધીનો છે, તો તેનો અર્થ એ છે કે તમારો લોન ચુકવણીનો રેકોર્ડ ખૂબ જ નબળો છે. પ્રતિષ્ઠિત નાણાકીય સંસ્થા પાસેથી લોન મેળવવી તમારા માટે લગભગ અશક્ય છે. 550 થી 649 સુધીના ક્રેડિટ સ્કોરને સરેરાશ ગણવામાં આવે છે. આ ક્રેડિટ સ્કોર પર લોન મેળવી શકાય છે, પરંતુ વ્યાજ દર વધારે હોઈ શકે છે.
ખરાબ ક્રેડિટ સ્કોરની અસર
- તમને નવી લોન લેવામાં મુશ્કેલી પડશે.
- વધુ વ્યાજ ચૂકવવું પડશે.
- પૂર્વ-મંજૂર લોન ઓફરમાં ઘટાડો થશે.
- લોન અરજી નકારી શકાય છે.
- જો તમને લોન મળશે તો તે કડક શરતો સાથે હશે.
